Njarðvík á toppinn

Njarðvík er komin á toppinn með 34 stig í Lengjudeild karla eftir sigur á Selfyssingum í Njarðvík í kvöld. Keflavík tapaði fyrir HK í leik kvöldsins og liðið er í 6. sæti deildarinnar með 25 stig. Grindvíkingar unnu mikilvægan sigur á Leikni R og eru Grindvíkingar með 17 stig í 8. sæti deildarinnar.

Njarðvíkingar höfðu betur í hörkuleik gegn Selfossi á heimavelli í kvöld og tryggðu sér mikilvægan sigur í Lengjudeildinni.

Gestirnir frá Selfossi byrjuðu betur og komust yfir á 19. mínútu þegar Raúl Tanque skoraði af öryggi úr vítaspyrnu. Heimamenn jöfnuðu þó fljótlega, á 28. mínútu, þegar Dominik Radic sneri vel í teignum eftir hornspyrnu og skoraði í fjærhornið.

Seinni hálfleikur var jafn og spennandi. Njarðvík fékk vítaspyrnu á 49. mínútu en Radic skaut framhjá og staðan hélt áfram að vera jöfn.

Á 79. mínútu kom hins vegar sigurmarkið – Ali Basem Almosawe átti fast skot sem fór af Radic og lyftist yfir markvörð Selfoss í netið.

Selfyssingar reyndu að jafna á lokamínútunum, meðal annars með innkomu Jóns Daða Böðvarssonar, en Njarðvík hélt út og fagnaði 2–1 sigri.

Lengjudeild karla: Grindavík - Leiknir R. 3–2
Endurkomusigur Grindvíkinga með þrennu

Grindavík tryggði sér þrjú stig í spennandi og markaleik gegn Leikni R. á heimavelli í kvöld. Þrátt fyrir að hafa lent tveimur mörkum undir snemma í leiknum sýndu heimamenn mikinn karakter, unnu sig inn í leikinn og kláruðu hann með dramatískum sigri.

Gestirnir úr Breiðholtinu byrjuðu af krafti og komust yfir strax á 9. mínútu þegar Shkelzen Veseli lagði upp glæsilegt mark fyrir Kára Stein Hlífarsson sem stangaði boltann í netið. Á 13. mínútu jók Shkelzen sjálfur forystuna með frábæru langskoti sem söng í markinu. Staðan orðin 0–2 og heimamenn í vandræðum.

Á 22. mínútu minnkuðu Grindvíkingar muninn þegar fyrirliðinn Adam Árni Róbertsson fylgdi eftir boltann í netið eftir mistök í vörn Leiknis. Á 34. mínútu jafnaði hann svo metin með baráttumarki eftir hornspyrnu. Fyrri hálfleikur endaði því 2–2 og leikurinn galopinn fyrir síðari hálfleik.

Síðari hálfleikur einkenndist af hörku, góðum vörslum beggja markvarða og fjölmörgum spjöldum. Á 82. mínútu fullkomnaði Adam Árni þrennuna með laglegu skallamarki eftir stoðsendingu frá Inga Þór Sigurðssyni. Grindavík var þá komið í 3–2 og lét forystuna ekki af hendi þrátt fyrir að missa Darren Sidoel af velli með tvö gul spjöld skömmu síðar.

Grindavík sýndi mikla seiglu í leiknum, snéri honum sér í hag og tryggði sér mikilvægan sigur í baráttunni í Lengjudeildinni. Adam Árni var óumdeildur maður leiksins með þrjú mörk og sterka frammistöðu í sókninni.

Lengjudeild karla: HK - Keflavík 3–0
Heimamenn nýttu færin best

HK tryggði sér öruggan 3–0 sigur á Keflavík í áhugaverðum leik í Kórnum í kvöld. Keflvíkingar voru meira með boltann og byrjuðu af miklum krafti, en HK-ingar refsuðu grimmilega úr færunum sínum.

Það tók aðeins 15 sekúndur fyrir Twana Khalid Ahmed dómara að dæma vítaspyrnu á HK þegar Stefan Ljubicic féll í teignum eftir peysutog. Ljubicic steig sjálfur á punktinn en setti boltann í stöngina. Keflvíkingar héldu þó áfram að stjórna leiknum fyrstu mínúturnar.

Á 16. mínútu sólaði Karl Ágúst Karlsson sig í gegnum alla vörn Keflavíkur og þrumaði boltanum í þaknetið – algjörlega gegn gangi leiksins. Á 24. mínútu bætti Tumi Þorvarsson við marki þegar skot hans breytti stefnu af varnarmanni og endaði í netinu.

Gestirnir sóttu stíft í seinni hálfleik og fengu meðal annars þrefalt dauðafæri á 56. mínútu sem Ólafur Örn í marki HK varði frábærlega. Á 70. mínútu kom svo þriðja markið þegar markvörður Keflavíkur, Sindri Kristinn, missti boltann í fætur Bart Kooistra sem þakkaði pent fyrir og skoraði. Þar með var leikurinn í raun kláraður.

HK-ingar vörðu forystuna með skipulögðum varnarleik og frábærum markvörslu Ólafs Arnar sem var öruggur allan leikinn. Keflvíkingar fengu sín færi en nýtingin var afleit.