Íþróttir

Keflavík vann úti
Natasha Anasi, fyrirliði Keflavíkur, skoraði tvö og tryggði sigur á útivelli. Mynd úr safni Víkurfrétta.
Jóhann Páll Kristbjörnsson
Jóhann Páll Kristbjörnsson skrifar
laugardaginn 19. september 2020 kl. 09:17

Keflavík vann úti

Keflvíkingar mættu Gróttu í gær í Lengjudeild kvenna. Keflavíkurstelpurnar hafa verið að leika afbragðs vel í sumar og sitja í næstefsta sæti deildarinnar á meðan Grótta er í fjórða sæti. Fyrirliðinn, Natasha Anasi, tryggði Keflavík sigurinn og skoraði hún tvö mörk í leiknum.

Keflvíkingar lentu undir snemma í leiknum (17') en Natasha jafnaði á 34. mínútu og staðan 1:1 í hálfleik.

Í seinni hálfleik skoraði Kara Petra Aradóttir á 54. mínútu og kom Keflavík í forystu, 2:1.

Forysta Keflvíkinga stóð ekki lengi því Grótta jafnaði fjórum mínútum síðar (58') en fyrirliðinn, Natasha, skoraði seinna mark sitt á 68. mínútu og tryggði Keflavík sigurinn.

Keflavík er einu stigi eftir Tindastóli, sem situr á toppi Lengjudeildarinnar, og sjö stigum fyrir ofan liðið í þriðja sæti, Hauka. Tindastóll og Haukar eiga þó leik til góða.