Grindavík/Njarðvík tapaði stórt fyrir Breiðabliki

Grindavík/Njarðvík hóf keppni í efri hluta Bestu deildar kvenna með 4–1 tapi gegn Breiðabliki á Kópavogsvelli í gærkvöldi. Blikar lögðu grunninn að öruggum sigri strax í fyrri hálfleik og leiddu 3–0 í leikhléi.

Agla María Albertsdóttir kom Breiðabliki yfir strax á annarri mínútu og aðeins tíu mínútum síðar bætti Kristín Dís Árnadóttir við öðru marki heimakvenna.

Edith Kristín Kristjánsdóttir skoraði þriðja mark Breiðabliks á lokamínútu fyrri hálfleiks og staðan því 3–0 þegar liðin gengu til búningsherbergja.

Júlía skoraði mark gestanna

Þórdís Elva Ágústsdóttir kom Breiðabliki í 4-0 á 52. mínútu. Átta mínútum síðar náði Grindavík/Njarðvík að klóra í bakkann þegar Júlía Ruth Thasaphong skoraði.

Fleiri mörk voru ekki skoruð og lokatölur urðu 4–1 fyrir Breiðabliki. Um var að ræða fyrstu umferðina eftir að Bestu deildinni var skipt í efri og neðri hluta.

Alls mættu 310 áhorfendur á Kópavogsvöll.