Þröstur í 2. sæti á Íslandsmótinu í eldsmíði

Þröstur Sigmundsson, nýkrýndur Norðurlandameistari í opnum flokki í eldsmíði og íbúi Reykjanesbæjar, varð í öðru sæti á Íslandsmótinu í eldsmíði sem fram fór í Kristnesi 12. september.

Alls tóku ellefu smiðir þátt í 14. Íslandsmeistaramótinu í eldsmíði að þessu sinni. Keppnisverkefnið var að smíða hnífapar ásamt skeið á þremur klukkustundum, þar sem reyndi á hugvit, fagurfræði og tæknilega kunnáttu keppenda.

Margfaldur Íslandsmeistari, Beate Stormo, stóð uppi sem sigurvegari en Þröstur Sigmundsson hafnaði í öðru sæti. Daði Jóhannesson varð þriðji.

Þröstur hefur vakið athygli innan greinarinnar á síðustu árum og bætti nýlega enn einum áfanganum við feril sinn þegar hann varð Norðurlandameistari í opnum flokki.

Eldsmíðin heillaði frá fyrstu kynnum

Aðspurður segir Þröstur að áhuginn á eldsmíði hafi kviknað fyrir nokkrum árum og síðan hafi handverkið orðið stór hluti af lífi hans.

„Það er eitthvað sérstakt við að taka járnstykki og móta það með eigin höndum. Maður hættir eiginlega aldrei að læra í þessari grein og það er alltaf hægt að gera betur. Það er það sem heillar mig mest,“ segir Þröstur.

Hann segir keppnina í Kristnesi hafa verið bæði skemmtilega og krefjandi.

„Verkefnið var á yfirborðinu nokkuð einfalt, en þegar farið er að vinna innan ákveðinna tímamarka skiptir hvert smáatriði máli. Það þarf að hugsa bæði um form, virkni og frágang á sama tíma.“

Mikill metnaður meðal íslenskra eldsmiða

Þröstur segir íslenska eldsmíði standa á sterkum grunni og að framtíð greinarinnar sé björt.

„Það sem gladdi mig sérstaklega var hversu margir ungir keppendur voru með að þessu sinni. Það sýnir að ný kynslóð er að taka við og áhuginn á handverkinu er mikill. Það lofar mjög góðu fyrir framtíðina.“

Aðspurður um árangurinn segist hann ánægður með annað sætið, sérstaklega í ljósi sterkrar samkeppni.

„Það er alltaf markmið að gera sitt allra besta. Ég er ánægður með útkomuna og tek dýrmæta reynslu með mér áfram í næstu verkefni og mót.“

Stoltur fulltrúi Reykjanesbæjar

Þrátt fyrir að keppnis- og meistaramót taki tíma leggur Þröstur áherslu á að Reykjanesbær sé heimabærinn.

„Það er alltaf ánægjulegt að geta komið fram fyrir hönd Reykjanesbæjar og sýnt að hér eru handverksmenn sem geta staðið jafnfætis þeim bestu. Ég vona að árangurinn geti jafnvel hvatt fleiri til að kynna sér þetta skemmtilega fag.“

Úrslit Íslandsmeistaramótsins í eldsmíði 2026

1. Beate Stormo, Íslandsmeistari
2. Þröstur Sigmundsson, Reykjanesbæ
3. Daði Jóhannesson