Vinstri Grænir
Vinstri Grænir

Íþróttir

Jafntefli og tap hjá Grindavík
Grindvíkingar fagna marki gegn Gróttu fyrr í sumar. Myndir úr safni Víkurfrétta
Jóhann Páll Kristbjörnsson
Jóhann Páll Kristbjörnsson skrifar
sunnudaginn 5. september 2021 kl. 13:24

Jafntefli og tap hjá Grindavík

Grindvíkingar töpuðu fyrir toppliði Fram í Lengjudeild karla í gær en með sigrinum tryggðu Framarar sér Lengjumeistaratitilinn í ár. Á föstudag gerði meistaraflokkur kvenna hjá Grindavík hins vegar mikilvægt jafntefli gegn HK sem ætti að tryggja þeim áframhaldandi sæti í Lengjudeild kvenna.

Gindavík - Fram (0:2)

Fram ætlaði sér sigur og ekkert annað í viðureign sinni við Grindavík í gær. Grindvíkingum hefur ekki gengið sem skildi í deildinni í ár og sjálfstraust þeirra í molum.

Framarar komust yfir á 33. mínútu þegar Gabriel Dan Robinson braut á sóknarmanni þeirra. Fram fékk víti sem Aron Dagur, markvörður Grindvíkinga, varði en Framarinn náði frákastinu og kom gestunum yfir.

Viðreisn
Viðreisn

Í seinni hálfleik braut Tiago Manuel Silva Fernandes klaufalega á sóknarmanni Fram og önnur vítaspyrna var dæmd (53'). Úr henni skoruðu Framarar og innsigluðu sigur sinn og sigur í deildinni.

Grindavík situr í áttunda sæti deildarinnar með 23 stig.

Sigurður Bjartur Hallsson hefur verið á markaskónum í sumar en Framarar náðu að halda honum í skefjum og koma í veg fyrir að hann setti sitt mark á leikinn í gær.

Grindavík - HK (1:1)

Grindvíkingar byrjaði betur í mikilvægum leik Grindavíkur og HK en aðeins einu stigi munar á liðunum sem eru í sjötta og sjöunda sæti Lengjudeildar kvenna.

Guðrún Helga Kristinsdóttir kom heimakonum yfir á 7. mínútu en HK jafnaði leikinn með marki úr vítaspyrnu á 34. mínútu. Ekkert mark var skorað í seinni hálfleik og liðin skiptu stigunum á milli sín.

Stigið gæti reynst Grindvíkingum dýrmætt því allt er galopið í fallbaráttunni en Grindavík hefur sautján stig í sjötta sæti, þremur stigum frá fallsæti þegar ein umferð er eftir.

Augnablik er í fallsæti og jafnvel þó þær vinni lokaleikinn (og Grindavík tapi) og jafni Grindavík að stigum þá munar tíu mörkum á markahlutfalli liðanna, Grindvíkingum í vil.

Grindvíkingar hafa náð góðum úrslitum á seinni hluta Íslandsmótsins, ekki síst Christabel Oduro að þakka sem hefur skorað fjórtán af 28 mörkum Grindavíkur.