Grindavík og Njarðvík sameina meistaraflokka í knattspyrnu kvenna

Formenn knattspyrnudeilda Grindavíkur og Njarðvíkur skrifuðu í kvöld undir samning þess efnis að meistaraflokkar kvenna UMFG og UMFN tefli fram sameiginlegu liði í Lengjudeild kvenna í knattspyrnu á næsta tímabili.

Formennirnir voru sammála um að þarna væri verið að stíga gæfuspor fyrir bæði félög en eins og þekkt er hefur lið Grindavíkur verið á hrakhólum frá því að rýma þurfti bæinn á síðasta ári og þá hafa Njarðvíkingar verið að leggja drög að meistaraflokki kvenna hjá félaginu síðustu ár.

Liðið mun leika undir merkjum Grindavíkur/Njarðvíkur í Lengjudeild kvenna á næsta tímabili.

Víkurfréttir ræddu þennan tímamótasamning við þá Hauk Guðberg Einarsson, formann knattspyrnudeildar Grindavíkur, og Brynjar Frey Garðarsson, formann knattspyrnudeildar Njarðvíkur, eftir undirskrift og Tinnu Hrönn Einarsdóttur, leikmann meistaraflokks, sem líst vel á sameininguna. Viðtölin verða birt á vef Víkurfrétta í fyrramálið.