Grindavík komið með aðra höndina á deildarameistaratitilinn í Bónusdeild karla
Grindavík tók á móti ÍR í 18. umferð Bónusdeildar karla í kvöld og hélt sínu striki, unnu sigur í hörku körfuboltalið þar sem tvö góð lið mættust, lokatölur 100-95 eftir að staðan í hálfleik var 61-50. Eftir þennan sigur þarf heldur betur allt að fara í skrúfuna hjá Grindvíkingum ef deildarmeistaratitillinn og þ.a.l. heimaleikjaréttur í gegnum alla úrslitakeppnina, verður ekki þeirra. Fjórir leikir eru eftir og eru Grindvíkingar með þremur færri tapleiki en næstu lið.
61 stig fengin á sig í fyrri hálfleik segir í raun alla söguna, það er erfitt að mæta á útivöll á móti langefsta liði deildarinnar, fá á sig 61 stig í fyrri hálfleik er ekki uppskriftin að sigri. ÍR-ingar sýndu samt mikinn karakter og komu alltaf til baka þegar Grindavík var komið með muninn upp fyrir tíu stigin. Í stöðunni 84-83 fengu ÍR-ingar nokkur tækifæri til að komast yfir og hver veit hvernig leikurinn hefði þróast þá en ekki er gáfulegt að vera mikið að spá í þeim frænkum, Ef og Hefði.
Það vantaði talsvert í lið Grindvíkinga í kvöld en þeir Daniel Mortensen, Kristófer Breki Gylfason og Arnór Tristan Helgason, voru ekki með. Ólafi fyrirliða var tjaslað saman en hefði líklega annars verið í borgaralegum klæðnaði. Það kom ekki að sök því Grindavík fékk frábært framlag af bekknum og er Nökkva Más Nökkvasonar sérstaklega getið í því sambandi. Aðalbreytingin á liði Grindvíkinga er samt nýleg Kanaskipti en eins og Jóhann Þór, þjálfari UMFG orðaði það, gæðin hreinlega leka af Jeremy Pargo! Hann skilaði 21 stigum og 9 stoðsendingum í kvöld og lítur hann virkilega vel út. Ekki þarf að hafa mörg orð um Deandre Kane, það blasa gæðin sömuleiðis við en í kvöld skilaði Kane 28 stigum og 6 fráköstum. Síðast en ekki síst er Jordan Semple gífurlegt stökk upp á við í fjórða útlendingaígildi Grindvíkinga. Hann er frábær að finna opin svæði og fáir eru betri að rúlla að körfunni. Hann og Pargo eiga að geta myndað banvænt tvíeyki í hinu rómaða „pick & roll.“ Semple skilaði 21 stigi og 10 fráköstum.
