Emma skoraði tvisvar á tveimur mínútum í sigri Grindavíkur/Njarðvíkur

Grindavík/Njarðvík vann FH 3:2 í efri hluta Bestu deildar kvenna í dag en leikið var í Njarðvík. Heimakonur voru komnar í 3:0 skömmu eftir hlé, en FH skoraði tvö síðustu mörkin og gerði lokakaflann spennandi.

Tinna Hrönn Einarsdóttir kom Grindavík/Njarðvík yfir á 43. mínútu. Eftir hornspyrnu hrökk boltinn út fyrir vítateig, þar sem Tinna tók við honum og skoraði með föstu vinstri fótar skoti.

Emma Nicole Phillips bætti við marki á 48. mínútu. Markvörður FH rann þegar hún ætlaði að ná bolta sem hafði verið skallað hátt upp í loftið innan teigs. Boltinn fór fram hjá henni og Emma nýtti færið. Aðeins mínútu síðar var Emma aftur á ferðinni. Hún náði sendingu inn fyrir vörn FH á undan markverði FH og kom boltanum í markið. Markvörður FH meiddist í úthlaupinu og þurfti að fara af velli.

Hafrún Birna Helgadóttir minnkaði muninn fyrir FH á 59. mínútu með skoti utan vítateigs í fjærhornið. Á 82. mínútu tók FH hornspyrnu sem barst út í teiginn. Hrönn Haraldsdóttir skallaði boltann að marki og Elín Björg Norðfjörð Símonardóttir breytti stefnu hans af stuttu færi. Staðan var þá orðin 3:2 og mikil spenna, en nær komst FH ekki þrátt fyrir sex mínútna uppbótartíma. Góður sigur Grindavíkur/Njarðvíkur því staðreynd.