Ungt fólk sem varð sjálfráða eftir rýmingu utan fyrirhugaðra sérkjara

Aldursviðmið í endurkaupaáætlun Þórkötlu var gagnrýnt á kynningarfundi í Grindavík í vikunni. Fyrirhugað er að heimila fólki sem var orðið 18 ára og átti lögheimili í bænum í nóvember 2023 að nýta sér sérkjör við kaup. Þeir sem hafa náð sjálfræðisaldri síðan falla ekki undir þann hóp samkvæmt kynningunni.

Örn Viðar Skúlason, framkvæmdastjóri Þórkötlu, sagði áætlunina eiga að ná til fleiri en þeirra sem áður áttu fasteign í Grindavík.

Með fyrirhugaðri lagabreytingu ættu fyrrverandi leigjendur og ungt fólk sem bjó í foreldrahúsum einnig að geta keypt eign af félaginu á sérkjörum, að því gefnu að það uppfyllti lögheimilis- og aldursskilyrðin.

Eva Lind gagnrýndi að viðmiðið tæki ekki til ungmenna sem væru orðin 18 ára í dag og vildu flytja heim. Hún spurði hvaða fólk félagið vildi fá aftur til Grindavíkur þegar þessi hópur félli utan fyrirkomulagsins.

Örn svaraði því til að þeir sem væru 18 ára nú hefðu verið 15 ára þegar atburðirnir hófust. Einhvers staðar þyrfti að draga mörkin.

Hann tók þó fram að mögulega mætti endurskoða aldursviðmiðið og sagði unga fólkið að sjálfsögðu velkomið til Grindavíkur.

Engin breyting á viðmiðinu var tilkynnt á fundinum.

Fyrirhuguð sérkjör fela meðal annars í sér tímabundna fjármögnun frá Þórkötlu, þriggja prósenta óverðtryggðan fjármagnskostnað og skilarétt. Lagabreyting er forsenda þess að félagið geti hafið gerð samninga samkvæmt áætluninni.