Sveinn Pálsson sæmdur gullmerki KSÍ á 90 ára afmælisdegi Reynis

Það var viðeigandi að 15. september 2025, á 90 ára afmælisdegi Knattspyrnufélagsins Reynis, væri Sveinn Pálsson sæmdur gullmerki Knattspyrnusambands Íslands. Sveinn er fæddur árið 1924, er heiðursfélagi í Reyni og eini núlifandi stofnfélagi félagsins. Þá er hann jafnframt höfundur hins glæsilega merki Reynis, sem allt Reynisfólk er ákaflega stolt af.

Það var Þorvaldur Örlygsson, formaður KSÍ, sem kom í Garðabæ og sæmdi Svein gullmerkinu á heimili hans. Með Þorvaldi voru Eysteinn Pétur Lárusson, framkvæmdastjóri KSÍ, og Andri Þór Ólafsson, formaður knattspyrnudeildar Reynis.

Sveinn á því einstakt hlutverk í sögu Reynisfélagsins, en hann var aðeins 10 ára gamall þegar félagið var stofnað árið 1935. Síðan þá hefur hann fylgt félaginu eftir alla tíð og tekið virkan þátt í félagsstarfi og menningu Garðsins. Hann hannaði merki félagsins á sínum yngri árum, merki sem hefur staðið tímans tönn og er eitt kunnasta í íslenskri knattspyrnu.

Með afhendingu gullmerkisins vill KSÍ heiðra einstakt ævistarf Sveins og mikilvæga sögu hans með Reyni. Það var því táknrænt að þessi viðurkenning skyldi fara fram á sjálfum afmælisdegi félagsins, sem hann tók þátt í að koma á laggirnar fyrir 90 árum.

Nánar verður fjallað um 90 ára afmæli Reynis í Víkurfréttum í næstu viku.