Suðurhlíð fær 20 milljóna króna styrk frá ráðuneytinu

Félags- og húsnæðismálaráðuneytið hefur veitt Suðurhlíð þolendamiðstöð 20 milljóna króna styrk til starfseminnar. Styrkurinn tryggir að starfsemi miðstöðvarinnar geti haldið áfram næsta árið.

Styrktarsamningur milli Félags- og húsnæðismálaráðuneytisins og Suðurhlíðar var undirritaður í gær. Rut Sigurðardóttir, rannsóknarlögreglumaður og formaður stjórnar Suðurhlíðar, og Inga Dóra Jónsdóttir, teymisstýra Suðurhlíðar, hittu Ragnar Þór Ingólfsson félags- og húsnæðismálaráðherra af því tilefni.

Á fundinum var farið yfir starfsemi Suðurhlíðar og mikilvægi þeirrar þjónustu sem þar er veitt þolendum ofbeldis.

Þjónusta á forsendum þolenda

Hjá Suðurhlíð er unnið með þolendum ofbeldis á þeirra eigin forsendum. Þar fá þolendur stuðning og ráðgjöf og er öll þjónusta miðstöðvarinnar þeim að kostnaðarlausu.

Suðurhlíð er rekin sem frjáls félagasamtök og þarf því að fjármagna starfsemina ár hvert. Styrkur ráðuneytisins, sem nemur 20 milljónum króna, er því mikilvægur þáttur í að tryggja áframhaldandi starfsemi þolendamiðstöðvarinnar á Suðurnesjum.

Fjölbreytt samstarfsverkefni á Suðurnesjum

Suðurhlíð er samstarfsverkefni Lögreglustjórans á Suðurnesjum, Grindavíkurbæjar, Reykjanesbæjar, Suðurnesjabæjar, Sveitarfélagsins Voga, Fjölbrautaskóla Suðurnesja, Heilbrigðisstofnunar Suðurnesja, Heilsugæslunnar Höfða, Keilis, Sambands sveitarfélaga á Suðurnesjum og Sýslumannsins á Suðurnesjum.

Með styrknum er lagður grunnur að því að Suðurhlíð geti áfram veitt þolendum ofbeldis mikilvægan stuðning, ráðgjöf og aðstoð á svæðinu.