Náttúra Reykjaness í brennidepli: Listahátíð barna og ungmenna opnar

Listasafn Reykjanesbæjar iðar af lífi fimmtudaginn 30. apríl þegar Listahátíð barna og ungmenna 2026 verður formlega sett. Þema ársins er náttúran á Reykjanesi og munu verk eftir yngstu listamenn bæjarins prýða sali safnsins.

Hátíðin verður sett með pompi og prakt í Duus húsum klukkan 10:30. Kjartan Már Kjartansson, bæjarstjóri, mun annast formlega opnun, en að henni lokinni verður slegið upp söngstund og sýningin skoðuð í sameiningu með börnunum.

Skapandi samstarf við leikskóla

Sýning ársins er staðsett í fremri sal listasafnsins og er afrakstur mikils skapandi starfs í leikskólum Reykjanesbæjar. Listasafnið bauð öllum leikskólum bæjarins í sérstakar listsmiðjur undir leiðsögn listamannanna Önnu Hallin og Olgu Bergmann.

Verkefnið, sem tókst vonum framar, var unnið með rausnarlegum styrk frá Barnamenningarsjóði. Útkoman er litrík túlkun barnanna á þeirri einstöku náttúru sem umlykur okkur hér á Suðurnesjum.

Útskriftarnemar FS sýna í Bíósal

Það eru ekki bara leikskólabörnin sem fá að njóta sín, því sama dag munu útskriftarnemar af listabraut Fjölbrautaskóla Suðurnesja opna sína útskriftarsýningu í Bíósal safnsins. Þar má sjá fjölbreytt verk sem endurspegla vinnu nemenda á lokaárinu.

Helga Þórsdóttir, safnstjóri Listasafns Reykjanesbæjar, hvetur íbúa og gesti til að leggja leið sína í Duus hús og upplifa þá sköpunargleði sem einkennir unga fólkið okkar.