Styrkir til björgunarsveita á Suðurnesjum úr sjóði Isavia og Landsbjargar

Fjórtán björgunarsveitir deila með sér 10 milljónum króna sem úthlutað var úr Styrktarsjóði Isavia og Slysavarnafélagsins Landsbjargar í sumar. Úthlutunin rann til fjórtán skilgreindra verkefna um allt land sem tengjast neyðarviðbúnaði, neðan- og ofanjarðar. Þar af hlutu þrjár björgunarsveitir á Suðurnesjum styrki til mikilvægra innviðaverkefna á sínum svæðum.

Eftirfarandi sveitir á Suðurnesjum fengu úthlutun í ár:

• Björgunarsveitin Skyggnir (Vogar): Hlýtur 750.000 kr. vegna verkefnisins „Börur á hjólum“.

• Björgunarsveitin Suðurnes (Reykjanesbær): Hlýtur 700.000 kr. í hópslysabúnað KEF (Keflavíkurflugvöll).

• Björgunarsveitin Þorbjörn (Grindavík): Hlýtur 496.000 kr. til kaupa eða uppsetningar á gámi fyrir búnað.

Kerrufjárfesting eykur viðbragðsgetu í flugslysum

Björgunarsveitin Suðurnes býr yfir umfangsmiklum hópslysabúnaði og sinnir hlutverki aðhlynningarstjóra samkvæmt flugslysaáætlun Keflavíkurflugvallar. Sveitin ber því ábyrgð á búnaði sem notaður er við uppsetningu söfnunarsvæðis slasaðra í flugslysum og öðrum hópslysum.

Fram til þessa hefur búnaðurinn verið geymdur í litlum færanlegum gámi en með auknum búnaði og breyttum kröfum var fjárfest í stórri yfirbyggðri kerru. Hún geymir allan nauðsynlegan búnað til að setja upp söfnunarsvæði með skjótum og öruggum hætti, sem eykur bæði yfirsýn, aðgengi og almenna viðbragðsgetu á Suðurnesjum.

Fjármagn í sjóðnum nam 10 milljónum króna fyrir þessa úthlutun. Áhugi og þörf björgunarsveitanna er gríðarleg, en alls bárust 26 umsóknir árið 2025 þar sem heildarupphæðin nam 114 milljónum króna.

Vegna þessa mikla munar á milli umsókna og tiltæks fjármagns var ákveðið að beita blandaðri nálgun við úthlutunina. Styrkir voru almennt ekki veittir umfram 15% af heildarfjármagni sjóðsins til einstakra verkefna og var leitast við að dreifa fjármagninu á fleiri verkefni í stað þess að fullfjármagna fá verkefni.

Sjóðurinn var endurvakinn í fyrravor með samningi Isavia og Landsbjargar til þriggja ára, sem hljóðar upp á samtals 30 milljónir króna. Markmið sjóðsins, sem upphaflega var stofnaður árið 2012, er að efla hópslysaviðbúnað í nágrenni flugvalla og fjölfarinna ferðamannastaða á Íslandi.