Sólborg orðin raka- og myglufrí

Endurbætur á skólahúsnæði leikskólans Sólborgar í Sandgerði hafa gengið vel og er skólinn nú raka- og myglufrír. Þetta kemur fram á vef Suðurnesjabæjar.

Öll vestari bygging (nýrri bygging) Sólborgar hefur verið tekinn í notkun en ennþá er verið að vinna að endurbótum í austari hluta (eldri byggingu) Sólborgar. Þessi hluti leikskólans er algjörlega afmarkaður frá þeim hluta skólans þar sem kennsla fer fram.

Stefnt er að því að allri vinnu við endurbætur ljúki öðru hvoru megin við mánaðarmótin janúar/febrúar. Elstu börnin, tæplega 40 talsins, sem eru í skólaseli Sandgerðisskóla, flytja þá yfir í Sólborg að nýju og ætti þá starfsemi Sólborgar að vera komin í eðlilegt horf. Áfram er gert ráð fyrir að yngstu börnin, um 40 talsins, verði í Mánaborg á Stafnesvegi.

Þá er stefnt að því að Sólheimar 5 („brúna húsið“), sem tilheyrði Sólborg, verði sett á sölu innan tíðar.