Toyota ársgamlir bílar á tilboði
Toyota ársgamlir bílar á tilboði

Fréttir

Rússinn Orlik er samfélagsvandamál í Njarðvík
Rússatogarinn Orlik við bryggju í Njarðvík. VF-mynd: Hilmar Bragi
Fimmtudagur 3. nóvember 2016 kl. 17:00

Rússinn Orlik er samfélagsvandamál í Njarðvík

- átti að rífa í brotajárn í Helguvíkurhöfn

Frá því snemma árs 2014 hefur rússneskur togari, Orlik, legið við landfestar í höfninni í Njarðvík. Togarinn er stærsta skipið í höfninni og gnæfir yfir önnur skip. Síðustu ár hefur það verið hlutskipti Njarðvíkurhafnar að vera skipakirkjugarður þar sem gömul fiskiskip hafa borið beinin. Nokkur hafa einnig sokkið við bryggju en verið bjargað upp aftur með tilheyrandi kostnaði.

Hinn rússneski Orlik er í eigu Hringrásar en fyrirtækið ætlaði að rífa skipið í brotajárn líkt og það gerði með gamla varðskipið Þór og flutningaskipið Fernanda sem varð eldi að bráð. Hins vegar kom babb í bátinn þar sem skipið inniheldur bæði spilliefni og asbest og því fékkst ekki leyfi til þess að fleyta skipinu upp í fjöru í Helguvík og rífa það þar.

Skipið hefur einnig verið vinsælt leiksvæði ungmenna og jafnvel hefur fullorðið fólk verið að flækjast um skipið undir áhrifum áfengis. Nágrannar Njarðvíkurhafnar hafa látið heyra í sér á samfélagsmiðlum og vilja skipið burt, enda engin prýði af því og þá stafar af því slysahætta. Togarinn er því ekki bara vandamál hafnarinnar, hann er samfélagsvandamál sem þarf að leysa.

Hjá Reykjaneshöfn fengust þær upplýsingar að ítrekað hafi verið haft samband við eigendur skipsins, bæði símleiðis og einnig með tölvupóstum, með það að markmiði að koma skipinu burt. Vegna uppbyggingar í Helguvík fer að vera síðasti séns að nota hafnarsvæðið til að rífa skipið. Áður þarf hins vegar að losa spilliefni úr því og fjarlægja asbest. Það væri hægt að gera við bryggju í Njarðvík en þyrfti þá heimild heilbrigðisyfirvalda. Til að bæta gráu ofan á svart þá er heimsmarkaðsverð á brotajárni lágt um þessar mundir og því ekki mikið upp úr því að hafa að rífa skip eins og Orlik í brotajárn.

Rússatogarinn hefur verið þyrnir í augum margra.

 

Ljósmyndastofa Oddgeirs
Ljósmyndastofa Oddgeirs