Reykjanesbær undir landsmeðaltali á öllum sviðum PISA

Nemendur í Reykjanesbæ eru undir landsmeðaltali í vísindum, stærðfræðilæsi og lesskilningi samkvæmt nýrri greiningu á niðurstöðum PISA 2025. Munurinn minnkar þegar tekið er tillit til bakgrunns nemenda en hverfur ekki.

Mennta- og barnamálaráðuneytið birti greininguna 8. október. Þar er árangur nemenda í sjö fjölmennustu sveitarfélögum landsins borinn saman við landsmeðaltal.

Reykjanesbær er eina sveitarfélagið í hópnum sem mælist undir landsmeðaltali á öllum þremur sviðum eftir leiðréttingu fyrir félags- og efnahagslegri stöðu og erlendum bakgrunni nemenda. Í greiningunni kemur fram að hlutfall nemenda með innflytjendabakgrunn sé hæst í Reykjanesbæ meðal sveitarfélaganna sjö og félags- og efnahagsleg staða þeirra lægst að jafnaði.

Lesskilningur sker sig úr

Áður en leiðrétt er fyrir bakgrunni er hlutfall nemenda í Reykjanesbæ sem nær grunnhæfni undir landsmeðaltali á öllum þremur sviðum. Eftir leiðréttingu er sá munur aðeins tölfræðilega marktækur í lesskilningi.

Þótt samsetning nemendahópsins skýri þannig hluta munarins stendur Reykjanesbær áfram verr að vígi í hlutfalli nemenda sem nær grunnhæfni í lesskilningi.

Ráðuneytið leggur áherslu á að leiðréttar niðurstöður segi ekki einar og sér til um gæði skólastarfs. Niðurstöður eru ekki birtar fyrir einstaka grunnskóla þar sem rannsóknin veitir ekki nægilega áreiðanlegar upplýsingar um svo litla nemendahópa.