Orkan kaupir meirihluta í Samkaupum

Orkan IS ehf., dótturfélag fjárfestingafélagsins SKEL, hefur gert samkomulag við Kaupfélag Suðurnesja (KSK) um kaup á 51,3% hlut í Samkaupum hf.
KSK, sem er stærsti hluthafi Samkaupa, selur hlut sinn fyrir um 2.878 milljónir króna. Kaupverðið miðast við að allt hlutafé Samkaupa sé metið á 5.610 milljónir króna og að skuldir séu teknar með í reikninginn er heildarvirði félagsins metið á tæplega 9,6 milljarða.

Kaupin verða ekki greidd með reiðufé, heldur með hlutabréfum í Orkunni sem eru metin á um 10,6 milljarða króna. Í kjölfarið mun SKEL eiga um 63% í nýju móðurfélagi smásölusamstæðunnar og verður virði þeirra hlutar metið á um 13,5 milljarða.

Samkaup rekur meðal annars verslanirnar Nettó, Kjörbúðina og Krambúðina. Með þessum kaupum og fyrri samruna Samkaupa og Atlögu (fyrrum Heimkaup) er verið að móta nýjan smásölurisa á Íslandi, segir í tilkynningu.

Nýja samstæðan mun starfa á sviði matvöruverslunar, orkusölu, bílaþvotta og lyfjaverslunar. Markmiðið er að búa til sterkan keppinaut á markaðnum sem getur boðið neytendum betri þjónustu, hagkvæmari lausnir og meiri samkeppni.

Viðskiptin eru háð ýmsum skilyrðum, þar á meðal að Samkeppniseftirlitið leggi blessun sína yfir þau og að Orkan tryggi frekari fjármagnsinnspýtingu með áskrift að hlutafé.

Ef allt gengur upp er stefnt að því að skrá nýja móðurfélagið á markað í Kauphöll Íslands fyrir árslok 2027. Þá fá aðrir hluthafar í Samkaupum og Lyfjavali einnig kost á að taka þátt í þessum viðskiptum á sömu kjörum.