Hugmyndir íbúa verða hafðar að leiðarljósi

Sveitarfélagið Vogar ætlar að ganga lengra í umhverfismálum og er nú unnið að gerð ítarlegrar umhverfisáætlunar sem á að tryggja fegrun og betri umhirðu bæjarins til framtíðar. Íbúakönnun mun spila lykilhlutverk í mótun áætlunarinnar.

Málið var nýlega tekið fyrir á fundi umhverfis- og skipulagsnefndar Sveitarfélagsins Voga. Áður hafði fulltrúum frá Heilbrigðiseftirliti Suðurnesja verið boðið á fund hjá nefndinni til að ræða stöðu umhirðumála í sveitarfélaginu, en í kjölfar þeirra samræðna var ákveðið að ráðast í heildstæðari vinnu.

Niðurstöður íbúakönnunar nýttar í áætlunina

Markmiðið er nú að móta skýra og ítarlega áætlun sem tekur á öllum helstu þáttum er varða umhirðu og ásýnd bæjarins.

Nefndin mun vinna áætlunina í nánu samstarfi við umhverfis- og skipulagssvið sveitarfélagsins. Lögð verður rík áhersla á að raddir bæjarbúa heyrist, en unnið verður út frá þeim hugmyndum og ábendingum sem berast í væntanlegri íbúakönnun, auk tillagna nefndarmanna sjálfra.

Með þessu vill sveitarfélagið tryggja að fegrunarátakið verði ekki einungis stundarfyrirbæri, heldur verði til skýr framtíðarsýn og vinnulag um hvernig haldið verði utan um umhverfismál í Vogum til lengri tíma litið.