Hætt við skipulagsbreytingu vegna lághitaholu við Vogshól og á Njarðvíkurheiði

Umhverfis- og skipulagsráð Reykjanesbæjar hefur samþykkt að hætta málsferli vegna breytinga á aðalskipulagi og nýs deiliskipulags sem átti að gera ráð fyrir nýju iðnaðarsvæði við Vogshól og á Njarðvíkurheiði fyrir lághitaborholu, þar sem rannsóknir hafa ekki sýnt nægan jarðhita til nýtingar á svæðunum.

Á fundi umhverfis- og skipulagsráðs 16. janúar 2026 var lagt fram erindi um breytingu á aðalskipulagi ásamt skipulagslýsingu og vinnslutillögu VSÓ ráðgjafar, dagsettri 16. apríl 2024. Fyrirhugaðar breytingar fólust í því að skilgreina ný iðnaðarsvæði við Vogshól og á Njarðvíkurheiði, með það að markmiði að koma þar fyrir lághitaborholu.

Áformin voru sett fram í kjölfar eldsumbrota á Reykjanesi og hugmyndin var að kanna möguleika á lághitanýtingu á þessum stöðum. Í fundargerðinni kemur þó fram að rannsóknir hafi ekki leitt í ljós að nægur jarðhiti sé á svæðunum til þess að hægt sé að nýta hann.

Með hliðsjón af niðurstöðum rannsókna var lagt til að hætta frekara ferli við aðalskipulagsbreytinguna og hið nýja deiliskipulag. Umhverfis- og skipulagsráð samþykkti þá tillögu.

Þrátt fyrir að hætt verði við þessa tilteknu skipulagsbreytingu segir í bókun ráðsins að leit að mögulegum lághitaholum verði haldið áfram. Jafnframt verði hugsanlegar breytingar á aðalskipulagi vegna slíkra verkefna fremur teknar inn sem hluti af heildarendurskoðun aðalskipulags Reykjanesbæjar.