Góð keiluveiði hjá línuskipunum: Áhafnirnar sáttar og kátar fyrir fimm vikna sumarfrí

Línuskip Vísis, Páll Jónsson GK og Sighvatur GK, halda áfram að gera það gott á keiluveiðum. Páll Jónsson landaði í heimahöfn sinni í Grindavík í gær og Sighvatur landar þar í dag.

Heimasíða Síldarvinnslunnar ræddi við skipstjórana á báðum skipum sem voru fljótir að hrósa jafnt veiðinni sem veðrinu í nýafstöðnum túrum.

Benedikt Jónsson, skipstjóri á Páli Jónssyni GK, var mjög ánægður með árangurinn en skipið var með tæplega 100 tonna afla eftir sex lagnir.

„Þetta var sallafínn túr en hann var allur tekinn í himnablíðu úti á Heimsmeistarahrygg. [...] Meirihluti aflans var keila, en einnig var nokkuð af löngu, karfa, keilubróður og fleiri tegundum. Það var nánast ekkert af þorski í aflanum. Keiluveiði að undanförnu hefur gengið býsna vel og menn eru vel sáttir og kátir,“ sagði Benedikt.

Aðalsteinn Rúnar Friðþjófsson, skipstjóri á Sighvati GK, var sömuleiðis á mjög svipuðum slóðum með sinn afla. Skipið kom til lands í gærkvöldi með um 60 tonna afla, þar sem keila vóg um 90% af heildarþunganum eftir fjórar lagnir.

„Byrjað var suður af Selvogsbanka, síðan var haldið suður af Surtsey, þá á Sneiðina og loks endað í Háfadýpinu. Veður var hið besta þar til í lokin en þá var vindurinn 15 – 18 metrar,“ sagði Aðalsteinn Rúnar um staðhætti og skilyrði á miðunum.

Nú tekur við kærkomið fimm vikna sumarstopp hjá bæði Páli Jónssyni GK og Sighvati GK. Að sögn skipstjóranna eru áhafnirnar á báðum skipum afar hressar með að fá gott og samfellt frí eftir törnina.