Fimmtíu sagt upp hjá Airport eftir fall Play

Flugafgreiðslufyrirtækið Airport Associates hefur þurft að segja upp rúmlega 50 starfsmönnum á Keflavíkurflugvelli í kjölfar falls flugfélagsins Play, sem var einn stærsti viðskiptavinur fyrirtækisins. Airport Associates veitir almenna flugafgreiðsluþjónustu fyrir fjölda flugfélaga á vellinum.

Samkvæmt gögnum Isavia stóð Play undir um 12 prósentum af heildarflugframboði til og frá Keflavíkurflugvelli og var því einn mikilvægasti viðskiptaaðili Airport Associates. „Fall Play þýðir að einn af okkar stærstu viðskiptavinum er hættur starfsemi, sem eru mikil vonbrigði. Það þýðir líka að við þurfum að draga saman seglin og stilla starfsmannafjölda í takt við þau verkefni sem eftir standa,“segir Sigþór Kristinn Skúlason, forstjóri Airport Associates við ruv.is.

Þrátt fyrir að Play hafi verið stór viðskiptaaðili hjá Airport Associates var umfangið þó minna en þegar WOW air fór í þrot árið 2019. Þá voru nokkur hundruð starfsmanna sem var sagt upp.

Sigþór er einnig forstjóri móðurfélags Airport Associates, Rea, sem átti hlut í Play. Hann viðurkennir að fall flugfélagsins hafi verið mikil vonbrigði. „Vonir stóðu til þess að Play tækist að snúa rekstrinum við, en því miður gekk það ekki upp. Svona er þetta með áhættufjárfestingar – annaðhvort ganga þær upp eða ekki. Flugbransinn er sérstaklega viðkvæmur; annaðhvort gengur hann rosalega vel eða alls ekki,“ segir hann.