Eldur í stórum timburhaug í Helguvík

Eldur kom upp í stórum timburhaug í Helguvík á þriðja tímanum síðastliðna nótt. Slökkvilið Brunavarna Suðurnesja var um um 40 mínútur að ná stjórn á eldinum.

„Þar sem erfitt er að fá vatn á svæðinu var kallað eftir aðstoð frá slökkviliði Grindavíkur sem kom með tankbíl, auk þess sem starfsmenn á frívakt voru boðaðir út.

Á vettvangi voru notaðir þrír dælubílar, körfubíll, tveir tankbílar og flutningsbíll sem kom með fleiri slöngur. Einnig voru fengnar vinnuvélar á svæðið til að krabba úr haugnum og gera slökkvistarfið aðgengilegra og skilvirkara.

Við slökkvistarfið voru notaðir um 120.000 lítrar af vatni. Lokið var við slökkvistörf um klukkan 07:00 í morgun, og nú stendur yfir frágangur og yfirferð á búnaði,“ segir í tilkynningu frá Brunavörnum Suðurnesja.