Bæjarráð Reykjanesbæjar gagnrýnir breytingar á leið 55

Bæjarráð Reykjanesbæjar harmar fyrirhugaðar breytingar Vegagerðarinnar á leið 55 hjá Landsbyggðastrætó, sem gengur á milli höfuðborgarsvæðisins, sveitarfélaganna á Suðurnesjum og Keflavíkurflugvallar. Þetta kemur fram í bókun bæjarráðs á fundi þess sem haldinn var í Hljómahöll 27. nóvember.

Vegagerðin hefur tilkynnt að frá og með 1. janúar 2026 verði stoppistöðvum leiðar 55 innan Reykjanesbæjar fækkað úr átta í tvær. Þá mun ferðum til og frá BSÍ á virkum dögum fækka úr átta niður í fimm. Meðal þess sem breytingarnar fela í sér er að hætt verður að aka í Ásbrú, sem er hverfi með um 5.000 íbúa.

Í svari Vegagerðarinnar til Reykjanesbæjar kemur fram að markmið breytinganna sé að aðlaga leiðakerfið að breyttum þörfum notenda og undirbúa það fyrir orkuskipti. Vísað er til stefnu stjórnvalda um að almenningssamgöngur innan einstakra sveitarfélaga séu á þeirra forræði, og að akstur leiðar 55 innan Reykjanesbæjar teljist því innanbæjarakstur.

Bæjarráð segir að með þessum breytingum geti íbúar Reykjanesbæjar illa nýtt strætó til og frá höfuðborginni snemma á morgnanna og seint á kvöldin. Þá kemur fram að kostnaður Reykjanesbæjar við að bæta við morgunakstri frá kl. 06–07 yrði um 15 milljónir króna á ári. Jafnframt er bent á að tekjur Reykjanesbæjar séu 13% lægri en meðaltal sjö stærstu sveitarfélaganna.

Í bókun bæjarráðs er ákvörðun Vegagerðarinnar sögð fela í sér skort á mikilvægri þjónustu fyrir fjórða stærsta sveitarfélag landsins. Vísað er til þess að framlög til almenningssamgangna hafi hækkað um 2,3 milljarða króna milli áranna 2024 og 2025, og að helstu breytingarnar hafi snúið að aukinni þjónustu í sveitarfélögum höfuðborgarsvæðisins, með styttri ferðatíma og lengri þjónustutíma.

„Áherslur á landsbyggðina og samfélögin þar mæta hér afgangi og við í Reykjanesbæ hörmum þessa ákvörðun Vegagerðarinnar,“ segir í bókun bæjarráðs.

Að lokum felur bæjarráð Kjartani Má Kjartanssyni bæjarstjóra að vinna málið áfram gagnvart viðeigandi stjórnvöldum.