Útlendingastofnun til Suðurnesja

Atvinnumálin á Suðurnesjum eiga að vera í brennidepli fyrir Alþingiskosningarnar 25. september n.k. Í veirufaraldinum kom berlega í ljós að atvinnulífið á svæðinu er of einsleitt. Rannsóknir hafa sýnt að á uppgangstímum getur það orðið raunin. Fjölmargir á Suðurnesjum starfa við flugið og ferðaþjónustuna. Þegar hrun varð í greininni varð skellurinn meiri og stærri en víðast hvar annars staðar á landinu. Það er því mikilvægt að horfa til fleiri þátta en ferðaþjónustunnar þegar kemur að atvinnuuppbyggingu og fjölgun starfa á svæðinu. Forðast ber að horfa í sama farið þar sem ein atvinnugrein er ríkjandi. Styðja þarf vel við fyrirtæki sem eru að hefja starfsemi á sviði nýsköpunar og frumkvöðlastarfs.

Á Ásbrú eru dæmi um vel heppnuð nýsköpunarverkefni sem hafa skilað fjölgun starfa. Það er gott og vel að ríkið setji peninga í nýsköpun en hafa ber í huga að þolinmæði er dyggð þegar kemur að frumkvöðlum og nýsköpun. Störfin skila sér ekki strax.

Lítið hefur verið rætt um það af hálfu stjórnvalda að flytja opinber störf til Suðurnesja. Jafnvel þó svo að þau ættu í raun heima á Suðurnesjum. Útlendingastofnun er að mínum dómi stofnun sem ætti að hafa aðsetur í Reykjanesbæ. Íbúar með erlent ríkisfang eru fjölmargir í Reykjanesbæ og um Keflavíkurflugvöll fara þeir sem óska eftir hæli hér á landi. Hjá Útlendingastofnun starfa 86 starfsmenn. Miðflokkurinn leggur áherslu á að stofnunin verði flutt í Reykjanesbæ.

Birgir Þórarinsson
Höfundur er þingmaður og oddviti Miðflokksins í Suðurkjördæmi.