Stærsta gervigreindarský Norðurlanda stækkar á Fitjum

Gagnaversfyrirtækið atNorth ráðgerir að halda áfram miklum vexti sínum í Reykjanesbæ, en gagnaverið á Fitjum er í dag eitt stærsta gervigreindarský á Norðurlöndunum. Eva Sóley Guðbjörnsdóttir, aðstoðarforstjóri atNorth, kynnti umsvif og framtíðaráform félagsins á Atvinnu- og framkvæmdaþingi Reykjanesbæjar. Fyrirtækið, sem á uppruna sinn að rekja til svæðisins, rekur í dag sjö gagnaver á Norðurlöndunum og fjárfestir fyrir um 200–250 milljarða króna á ári, þar af umtalsverðan hluta í Reykjanesbæ.

Hámarkssjálfbærni og milljarða verðmætasköpun í nærsamfélaginu

Vegna hagstæðs veðurfars og kælingar á Fitjum er orkunýtni gagnaversins með því lægsta og besta sem gerist á heimsvísu. atNorth óskar nú eftir samstarfsaðilum til að nýta afgangsvarma sem myndast við reksturinn, en tækifærin felast meðal annars í uppbyggingu í gróðurhúsaræktun eða annarri starfsemi í nærumhverfinu. Það væri meira að segja hægt að hita upp baðlón með varmanum sem verður til í gagnaverinu.

Verkefnið hefur umtalsverð efnahagsleg áhrif, en óháð úttekt KPMG sýnir að fyrir hvert starf hjá atNorth verða til um 12 afleidd störf. Áætlað er að efnahagsleg verðmætasköpun félagsins í nærsamfélaginu í Reykjanesbæ nemi um 76 milljörðum króna á næstu árum, auk þess sem umtalsverðar fjárhæðir munu renna í samfélagsverkefni á svæðinu. Eva Sóley undirstrikaði að mikill metnaður ríkti hjá félaginu og viðskiptavinum þess til að halda áfram uppbyggingu í Reykjanesbæ og vera virkur og samfélagslega ábyrgur þátttakandi á Suðurnesjum.

Í spilaranum hér að neðan er upptaka frá þinginu.