Uppbyggingarsjóður 2022
Uppbyggingarsjóður 2022

Viðskipti

Þurfti að nurla fyrir fyrstu hjólbörunum
Hjónin Hjalti Már Brynjarsson og Geirný Geirsdóttir á skristofu Grjótgarða.
Páll Ketilsson
Páll Ketilsson skrifar
þriðjudaginn 6. september 2022 kl. 08:18

Þurfti að nurla fyrir fyrstu hjólbörunum

Grjótgarðar efh. hafa vaxið og stækkað mikið á tíu árum en fyrirtækið fagnaði áratugs afmæli á árinu.

„Ég byrjaði nú eiginlega bara með tvær hendur og þurfti að nurla fyrir fyrstu hjólbörunum en þetta hefur vaxið og dafnað á hverju ári eftir að við fengum fyrsta stóra verkefnið í Grindavík fyrir sjö árum síðan,“ segir Hjalti Már Brynjarsson skrúðgarðyrkjufræðingur og stofnandi fyrirtækisins Grjótgarðar ehf. Það gerðist snemma árs 2012 eftir að Hjalti útskrifaðist úr Garðyrkjuskóla Íslands. 

Hjalti og Geirný Geirsdóttir, eiginkona hans fögnuðu áratugs afmæli fyrirtækisins fyrr á þessu ári en það er stofnað í marsmánuði. Það var ekki hentugt að fagna síðasta vetur þegar heimsfaraldur var enn að trufla mannlífið en afmælisveislu var slegið upp í sumar. „Já, við buðum starfsfólki okkar og helstu samstarfsaðilum og héldum upp á tímamótin. Það var gaman. Þetta hefur gengið glimrandi vel, sérstaklega eftir 2015. Þá varð ákveðinn vendipunktur í rekstrinum. Þetta var eiginlega bara sumarfyrirtæki fyrstu 2-3 árin, við vorum ekki nema þrír starfsmenn yfir veturinn en eftir að við fengum stórt verkefni við nýtt íþróttamannvirki í Grindavík fóru hjólin að snúast,“ segir Hjalti þegar hann settist niður með fréttamanni Víkurfrétta í húsnæði Grjótgarða við Fitjabraut 4 í Njarðvík. 

Heppinn með starfsfólk

Hjalti vann í tólf ár hjá Jóni Olsen í Nesprýði og lærði þar góðan grunn en menntaði sig svo í skrúðgarðyrkju fræðum. „Við byrjuðum í upphafi í garðvinnu og lóðafrágangi en því til viðbótar í dag sinnum við einnig almennri jarðvinnu, slætti og snjómokstri,“ segir Hjalti. 

Það þarf meira en hjólbörur í þessi verkefni og í dag er fyrirtækið mjög vel tækjum og tólum búið. „Og ótrúlega góðu starfsfólki. Við höfum verið mjög heppin og margir karlarnir hafa verið lengi hjá okkur, nokkrir alveg frá upphafi,“ segir Hjalti en flestir eru þeir „uppaldir“ í Grjótgörðum en nokkrir hafa farið í nám og í dag eru tveir nemar í vinnu hjá fyrirtækinu. 

En hverjir eru helstu viðskiptavinirnir?

„Við erum með nokkra mjög stóra viðskiptavini eins og sveitarfélögin, Bláa lónið, HS Orku og Isavia en vinnum einnig fyrir minni aðila og einstaklinga.“

Starfsmenn hafa verið að jafnaði þrjátíu og fimm hjá Grjótgörðum undan farin ár en það er eitt nokkurra Suðurnesjafyrirtækja sem er með rammasamning við Isavia sem snýr að verkefnum við flugstöðina en þar er gríðarleg uppbygging í gangi. 

Stapaskólalóðin meistaraverk

Þegar Hjalti er spurður út í sérstök verkefni sem hann hefur tekið að sér nefnir hann skólalóðina við Stapaskóla í Innri Njarðvík. „Þessi framkvæmd var ótrúlega skemmtilegt og líklega er þetta ein flottasta skólalóð landsins. Algjört meistaraverk segi ég og frábært verkefni. Lóðin var teiknuð upp og við kláruðum hana, fengum góða undirverktaka með okkur og þetta gekk vel. Við leggjum mjög mikla áherslu á að skila verkum okkar vel frá okkur. Viljum vanda okkur og gera vel. Þú ert alltaf dæmdur af þínum verkum og það hefur verið kappsmál hjá okkur.“

En hvað með þróun í þessum málum, hefur lóðafrágangur og tengd vinna ekki breyst eitthvað á svæðinu?

„Þróunin er sú að nú vilja allir klára umhverfið hjá sér, t.d. innkeyrslur og lóðir. Þetta er reyndar svolítið staðbundið við Suðurnesin. Hér vill fólk ekki hafa malarplan hjá sér en það er ekki sama uppi á teningnum í mörgum öðrum sveitarfélögum eins og t.d. á Selfossi og Akranesi. Þú sérð ekki nýjar malar innkeyrslur við hús á Suðurnesjum. Við viljum helst hafa tjörn og gosbrunn,“ segir Hjalti og hlær en viðurkennir að þróunin sé jákvæð og tengist líka mörgum góðum byggingaverktökum á Suðurnesjum sem hafa metnað í þessum málum. Hjalti nefnir aðilar sem Grjótgarðar hafa unnið með eins og Sparra, Hugverktaka og Bygg en Grjótgarðar sáu um garðvinnu og frágang í Hlíðahverfi í Reykjanesbæ. „Við höfum líka verið í miklu og góðu samstarfi við fleiri góða aðila eins og Ellert Skúlason,“ segir Hjalti.

Samfélagsleg ábyrgð

Hjalti segir að hann hafi alla tíð viljað sinna samfélagslegri ábyrgð í rekstri fyrirtækisins. „Já, við höfum styrkt íþróttahreyfinguna og fleiri aðila á Suðurnesjum. Við þurfum öll sem erum í rekstri á Suðurnesjum að gera það,“ en kappinn er gallharður Njarðvíkingur og er í stjórn knattspyrnudeildar UMFN. Njarðvíkurfánar eru við hún á vinnusvæði Grjótgarða í Njarðvík. „Já, ég er gallharður Njarðvíkingur. Við erum komnir upp um deild og stefnum hátt. Það var gaman þegar við unnum Keflavík í bikarkeppninni í sumar,“ segir Hjalti. 

Aðspurður út í horfurnar í atvinnulífinu á svæðinu segist hann hafa nokkrar áhyggjur af hækkunum á aðföngum og verðbólgu og fleiru sem tengist rekstrinum. Á leið fréttamanns út af skrifstofunni eftir okkar spjall hittum við fyrir Geirnýju, betri helming Hjalta en hún sér um bókhaldið og fleiru því tengdu. Grjótgarðar náðu þeim frábæra árangri á síðasta ári að komast í hóp Framúrskarandi fyrirtækja á Íslandi en um 2% fyrirtækja landsins eru í þeim hópi. „Við ætluðum aldrei að verða svona stór þegar við byrjuðum í bílskúrnum. Við erum saman í þessu og gengur bara vel,“ segir Geirný og brosir. Hjalti tekur undir þetta hjá eiginkonunni og segir mikilvægt að sinna þessum ábyrga þætti í fyrirtækjarekstri vel. „Það eru ekki allir sem mæla með því að hjón séu saman í vinnunni en það hefur gengið vel hjá okkur,“ segir Hjalti að lokum.

Hjalti horfir stoltur á myndir af tækjaflota fyrirtækisins en hann hefur stækkað mikið.

Hjalti á lóð fyrirtækisins í Njarðvík. 

Fyrirtækið byrjaði með einar hjólbörur. Nú eru þær fleiri og tækin líka.