Hilmar Bragi með ljósmyndasýningu í Bókasafni Reykjanesbæjar

Yfirsýn er heiti ljósmyndasýningar Hilmars Braga Bárðarsonar í Átthagastofu Bókasafns Reykjanesbæjar. Sýningin var opnuð í gær og verður opin á opnunartíma Bókasafns Reykjanesbæjar fram yfir Safnahelgi á Suðurnesjum í mars.

Hilmar Bragi Bárðarson hefur starfað við fréttamennsku hjá Víkurfréttum í yfir þrjátíu ár. Samhliða starfi sínu sem blaðamaður hefur hann tekið ógrynni ljósmynda um öll Suðurnes og öðlast þannig góða yfirsýn yfir samfélagið á Suðurnesjum.

Á þessari sýningu sýnir Hilmar Bragi ljósmyndir frá sjónarhorni sem við eigum ekki að venjast, allar myndirnar eru teknar með dróna og flestar lóðrétt niður.

Öll verk sýningarinnar eru til sölu.