Vogar | Þróttur hlýtur Sjálfbærniverðlaun KSÍ í fyrsta sinn

Knattspyrnufélagið Þróttur úr Vogum skráði sig í sögubækurnar á dögunum þegar félagið hlaut Sjálfbærniverðlaun KSÍ fyrir árið 2025. Verðlaunin voru nú afhent í fyrsta skipti í tengslum við ársþing knattspyrnusambandsins.

Tilefni verðlaunanna er afar sérstakt framtak félagsins í nágrannaslag Þróttar og Víðis í 2. deild karla á liðnu tímabili. Í stað þess að fá yngri iðkendur til að leiða leikmenn inn á völlinn, líkt og venjan er, fékk félagið eldri borgara úr Vogum til að sinna hlutverkinu.

Fótbolti fyrir alla – alla ævi

Verkefnið þótti takast einstaklega vel og vakti athygli langt út fyrir raðir stuðningsmanna liðanna. Í rökstuðningi KSÍ segir að framtakið hafi brúað kynslóðabil á fallegan og táknrænan hátt, auk þess að sýna að fótbolti sé fyrir alla – óháð aldri.

Hugmyndin kviknaði innan samfélagsins í Vogum og var framkvæmd af mikilli hlýju og virðingu. Með þessu tókst félaginu að veita eldri borgurum í nærumhverfinu verðskuldaðan sýnileika og styrkja tengslin við grasrótina.

Einfalt en áhrifaríkt

Dómnefnd taldi verkefnið vera frábært dæmi um hvernig hægt er að nýta knattspyrnuna til samfélagslegrar eflingar með einföldum en skapandi hætti.