Voga-Þróttarar á blússandi siglingu með fullt hús stiga

Ekkert lát er á gengi Þróttara úr Vogum en þeir hafa unnið alla fimm leiki sína til þessa í 2. deildinni og eru komnir með örugga forystu á toppnum. Víðismönnum gengur ekki eins vel og eru í níunda sæti. Í 3. deildinni eru Reynismenn um miðja deild eftir jafntefli í síðustu umferð. Fulltrúar 4. deildar eru Hafnarmenn, þeir hafa ekki farið vel af stað og eru með einn sigur og þrjú töp til þessa. Í 5. deildinni er það lið RB sem kemur fram fyrir hönd Suðurnesjanna og hafa þeir farið vel af stað, eru á toppnum ásamt öðru liði eftir tvo sigra í fyrstu tveimur leikjunum.

2.deild

KFA - Þróttur Vogum 0-3

Rúnar Ingi Eysteinsson með fyrstu tvö mörk Þróttara og hefur heldur betur verið á eldi í síðustu þremur leikjum, skoraði fjögur mörk í þeim og er næst markahæstur í deildinni. Þriðja markið skoraði Birgir Halldórsson.

Víðir - Grótta 1-1

David Toro Jiminez kom Víði yfir úr víti á 41. mínútu en Grótta jafnaði í upphafi seinni hálfleiks og þar við sat.

3. deild

Reynir - Ýmir 3-3

Reynismenn lentu 0-3 undir og þannig var staðan í hálfleik. Jökull Máni Jakobsson minnkaði muninn á 70. mínútu og Jordan Smylie skoraði tvö, jöfnunarmarkið á 90. mínútu!

4. deild

Hafnir - Árborg 1-4

Mark William Leitch kom Hafnarmönnum yfir en Adam var ekki lengi í paradís, Árborgarmenn svöruðu með fjórum mörkum. Hafnir í 8. sæti með 4 stig.

5. deild

BF 108 - RB 0-1

Roberto Adompai með mark Reykjanesbæinga.