Tómas tryggði Þrótti dramatískan sigur á lokamínútunum

Það var mikil spenna í Vogunum í dag þegar Þróttur tók á móti Haukum í 2. deild karla. Svo fór að heimamenn fögnuðu dýrmætum þriggja stiga sigri eftir dramatískar lokamínútur.

Heimamenn mættu ákveðnir til leiks og þurftu ekki að bíða lengi eftir fyrsta markinu. Strax á 8. mínútu kom Eiður Jack Erlingsson Þrótti yfir og staðan var 1-0 allt fram í síðari hálfleik.

Seint jöfnunarmark og dramatík í lokin

Haukar sóttu fast að jöfnunarmarki og það bar loks árangur á 77. mínútu þegar Einar Karl Ingvarsson kom boltanum í netið. Allt útlit var fyrir að liðin myndu skipta með sér stigunum, en Vogamenn voru ekki á þeim buxunum að gefast upp.

Þegar klukkan nálgaðist leikslok, nánar tiltekið á 89. mínútu, skoraði Tómas Þórðarson sigurmarkið við gífurlegan fögnuð viðstaddra. Þrjú stig í hús fyrir framan stútfulla stúku.

Hilmar Bragi var með myndavélina í Vogum í dag og smellti af myndunum sem sjá má hér að neðan í upphafi leiks.

Þróttur V - Haukar (2:1) / 2. deild karla 1. maí 2026