Pétur Már tekur við meistaraflokki kvenna hjá Grindavík

Pétur Már Sigurðsson hefur verið ráðinn þjálfari meistaraflokks kvenna í körfuknattleik hjá Grindavík. Hann hefur þegar skrifað undir samning við félagið og er undirbúningur fyrir næsta tímabil hafinn.

Með ráðningu Péturs fær Grindavík til liðs við sig einn reynslumesta og virtasta körfuboltaþjálfara landsins. Hann hefur komið að fjölmörgum verkefnum í íslenskum körfubolta í gegnum tíðina, bæði sem þjálfari og leiðtogi, og er koma hans sögð mikill styrkur fyrir félagið á þessum tímapunkti.

Byggt á sterkum grunni

Fram undan eru spennandi tímar hjá Grindavíkurstúlkunum og er mikil vinna þegar hafin við undirbúning næsta árs. Í tilkynningu frá félaginu kemur fram að með ráðningu Péturs sé verið að byggja áfram á þeim sterka grunni sem hefur einkennt Grindavíkurliðið í gegnum árin.

„Við bjóðum Pétur Má hjartanlega velkominn til Grindavíkur og hlökkum til að sjá hann leiða liðið inn í nýtt tímabil í gulu og bláu,“ segir í kveðju frá félaginu.