Markalaust jafntefli í Njarðvík

Njarðvík og ÍBV skildu jöfn í markalausu jafntefli þegar liðin mættust í lokaleik fjórðu umferðar Lengjudeildar karla í knattspyrnu fyrr í dag.

Njarðvík - ÍBV 0:0

Það blés hressilega í Njarðvík í dag og Njarðvíkingar höfðu vindinn með sér í fyrri hálfleik og höfðu þá ágætis tök á leiknum. Njarðvík stýrði leiknum en það vantaði upp á gæðin hjá þeim efst á vellinum og þeim gekk illa að skapa sér færi. Eyjamenn vörðust vel og aftarlega en sóttu hratt þegar færi gafst og sóknir þeirra voru talsvert beittari en heimamanna.

Markvörður Eyjamanna „þarfnaðist“ aðhlynningar þegar sókn Njarðvíkinga þyngdist í fyrri hálfleik og Eyjamenn notuðu tækifærið til að halda krísufund á hliðarlínunni.

Í seinni hálfleik snerist dæmið við og Eyjamenn tóku leikinn yfir. Sóknarþungi ÍBV var mikill og eftir því sem leið á leikinn þyngdist sókn gestanna og Njarðvíkingar voru á löngum köflum í nauðvörn. Njarðvíkingar geta þakkað markverði sínum, Aroni Snæ Friðrikssyni, fyrir að hafa fengið stig úr leiknum en Aron varði eins og berserkur og var langbestur heimamanna í dag. Þá átti Björn Aron Björnsson góðan dag í vörn og sókn en Eyjamenn fundu enga leið framhjá honum og þá var hann einnig gríðarlega vinnusamur fram á við. Þegar Birni var skipt út af (77’) var hann örugglega búinn að tæma tankinn.

Björn Aron lagði sig allan í leikinn í dag.

Freysteinn Ingi Guðnason átti einnig sterka innkomu síðasta korterið af leiknum og hressti örlítið upp á sóknarleik Njarðvíkur en eins og fyrr segir var ekkert mark skorað og Njarðvíkingar því enn taplausir í Lengjudeildinni í ár og verma efsta sætið en Fjölnismenn eru jafnir þeim að stigum.

Jóhann Páll Kristbjörnsson, ljósmyndari Víkurfrétta, var á leiknum í dag og er myndasafn neðst á síðunni. Þá má horfa á leikinn í spilaranum hér að neðan.