Fjörheimar
Fjörheimar

Íþróttir

Hola í höggi  á Bergvíkinni
Jóhann Páll Kristbjörnsson
Jóhann Páll Kristbjörnsson skrifar
mánudaginn 8. júní 2020 kl. 12:57

Hola í höggi á Bergvíkinni

Agnar Mar Gunnarsson sló draumahöggið síðasta miðvikudag þegar hann lék golf á Hólmsvelli í Leiru.

Fyrsta umferð Geysisdeildarinnar, liðakeppni sem haldin er hjá Golfklúbbi Suðurnesja, fór fram á miðvikudag. Agnar keppti þar í tvímenningi og sló hið fullkomna högg á þriðju braut Leirunnar, Bergvíkinni. Hann notaði 5-járn og sló boltann sem sveif í fallegum sveig í átt að pinna. Af teig var ekki hægt að sjá boltann detta í holuna en höggið var gott, á því var enginn vafi. Það var svo ekki fyrr en á flötina var komið að allur sannleikurinn kom í ljós, boltinn lá í holunni.

Það þarf ekki að taka fram að Agnar vann holuna (og einnig leikinn) en haft var á orði að þarna hafi hann farið illa með forgjöfina sem hann átti á andstæðing sinn á þessari holu.

Blaðamaður Víkurfrétta var í sama holli og varð vitni að högginu góða honum þótti því tilvalið að fá Agga til að svara nokkrum laufléttum spurningum í Netspjalli við Víkurfréttir.

Hávær kennarasleikja með brennandi áhuga á íþróttum

– Agnar er gegnheill Njarðvíkingur og körfuboltaþjálfari, það fyrsta sem hann myndi sýna gestum utan af landi á Reykjanesi væri Ljónagryfjan.

– Nafn:

Agnar Mar Gunnarsson.

– Árgangur:

1982.

– Fjölskylduhagir:

Giftur og þrjú börn.

– Búseta:

Njarðvík City.

– Hverra manna ertu og hvar upp alin:

Hulda Örlygsdóttir og Elvar Gottskálksson ólu mig upp hér í Reykjanesbæ en ég er sonur Huldu og Gunnars Maríussonar.

– Starf/nám:

Hef unnið hjá Reykjanesbæ í 25 ár og við þjálfun körfubolta í 22 ár.

– Hvað er í deiglunni?

Sumarfrí og golf.

– Hvernig nemandi varstu í grunnskóla?

Rólegur nemandi, kennarasleikja.

– Hvernig voru framhaldsskólaárin?

Þægileg og skemmtileg.

– Hvað ætlaðir þú að verða þegar þú yrðir stór?

Kokkur.

– Hver var fyrsti bíllinn þinn?

Volkswagen Jetta.

– Hvernig bíl ertu á í dag?

Landcruiser.

– Hver er draumabíllinn?

Nýr Landcruiser.

– Hvert var uppáhaldsleikfangið þitt þegar þú varst krakki?

Körfubolti/fótbolti.

– Besti ilmur sem þú finnur:

Íslenska loftið.

– Hvernig slakarðu á?

Ligg upp’í sófa.

– Hver var uppáhaldstónlistin þín þegar þú varst u.þ.b. sautján ára?

Queen.

– Uppáhaldstónlistartímabil?

1970–1980.

– Hvaða tónlist fær þig til að sperra eyrun þessa dagana?

Róleg tónlist (er gömul sál).

– Hvers konar tónlist var hlustað á á þínu heimili?

Alls kyns tónlist.

– Leikurðu á hljóðfæri?

Nei.

– Horfirðu mikið á sjónvarp og hvernig?

Reyni að horfa á kvöldin þegar maður hefur tíma, þá aðallega íþróttir en dett stundum í góðar seríur og kvikmyndir.

– Hverju missirðu helst ekki af í sjónvarpinu?

Beinar útsendingar, íþróttir.

– Besta kvikmyndin:

Shawshank Redemption.

– Hver er uppáhaldsbókin þín og/eða rithöfundur?

Lalli ljósastaur, Þorgrímur Þráins.

– Hvað gerir þú betur en allir aðrir á þínu heimili?

Drasla til.

– Hvert er snilldarverkið þitt í eldhúsinu?

Hunangsgljáð, grillið kjúllabringa með sætum kartöflum.

– Hvernig er eggið best?

Brotið (borða ekki egg).

– Hvað fer mest í taugarnar á þér í fari þínu?

Hvað ég er hávær.

– Hvað fer mest í taugarnar á þér í fari annarra?

Reyni að láta fólk ekki fara í taugarnar á mér.

– Uppáhaldsmálsháttur eða tilvitnun:

Aukaæfingin skapar meistarann.

– Hver er elsta minningin sem þú átt?

Úfff, man ekki einu sinni hvað ég gerði í gær.

– Orð eða frasi sem þú notar of mikið:

Shaka Baby!

– Ef þú gætir farið til baka í tíma, hvert færirðu?

Landnámsaldar.

– Hver væri titillinn á ævisögu þinni?

Gaurinn sem bjó í íþróttahúsi.

– Þú vaknar einn morgun í líkama frægrar manneskju og þarft að dúsa þar einn dag. Hver værirðu til í að vera og hvað myndirðu gera?

Donald Trump og hoppa ofan af þaki.

– Hvaða þremur persónum vildirðu bjóða í draumakvöldverð?

Michael Jordan, TigerWoods og Maradonna.

– Hvernig hefur þú verið að upplifa árið 2020 hingað til?

Skrýtnir tímar.

– Er bjartsýni fyrir sumrinu?

Ég er mjög bjartsýnn.

– Hvað á að gera í sumar?

Slaka á, ferðast með vinum, golfast.

– Hvert ferðu í sumarfrí?

Ekkert planað eins og er.

– Ef þú fengir gesti utan af landi sem hafa aldrei skoðað sig um á Suðurnesjum. Hvert myndir þú fara með þá fyrst og hvað myndir þú helst vilja sýna þeim?

Myndi alltaf sýna þeim Ljónagryfjuna og svo kannski þennan hring sem allir fara um Reykjanesið.

– Ef þú gætir hoppað upp í flugvél og réðir hvert hún færi, þá færirðu ...

... til Víetnam.