Max Norhern Light
Max Norhern Light

Íþróttir

Grindavík tapar enn
Grindavíkurstúlkur töpuðu í botnbaráttuslag. Mynd/karfan.is
Föstudagur 21. febrúar 2020 kl. 11:12

Grindavík tapar enn

Möguleikar Grindavíkurstúlkna að halda sér í Domino’s deildinni í körfubolta minnkuðu mikið eftir tap í botnbaráttuleik gegn Breiðabliki. Lokatölur urðu 89:68 en leikið var í Kópavogi.

Blikastúlkur stýrðu leiknum frá upphafi og leiddu með 15 stigum í hálfleik. Það forskot juku þær í síðari hálfleik og þær grindvísku náðu ekki að sýna sitt rétta andlit og miðað við frammistöðu þeirra í vetur er fátt annað sem bíður þeirra en að falla niður um deild en það er þó ekki útilokað. Þær eru aðeins tveimur stigum fyrir neðan Blika.

Tania Pierre-Marie skoraði tæplega annað hvert stig Grindavíkur en hún var með 28 stig og 9 fráköst. Hrund Skúlasdóttir var með 10 stig og Bríet Sif Hinriksdóttir skoraði líka tíu.

Næsta umferð í Domino’s deild kvenna verður á laugardag 22. Febrúar en þá fær Keflavík KR í heimsókn en Vesturbæjardömurnar unnu topplið Vals í vikunni og það verður því verðugt verkefni fyrir ungt lið Keflavíkur að leggja þær að velli. Grindavík fer í Valsheimilið og leikur við efsta lið deildarinnar.