„Erum að byggja fallegustu götuna í Garðinum“

Nú er uppsteypa hafin á síðasta húsinu við Báruklöpp í Garði. Byggingaverktakinn Bragi Guðmundsson ehf. fékk götunni úthlutað um mitt ár 2018 og fyrsta skóflustungan var tekin í desember 2021 af Báru Bragadóttur. Í Báruklöpp eru níu hús með samtals tuttugu og fjórum íbúðum, parhús og raðhús.

Bragi Guðmundsson ehf. er byggingaverktakafyrirtæki í eigu feðganna Braga Guðmundssonar og Sveinbjörns Bragasonar. Þeir feðgar hafa verið afkastamiklir í húsasmíði í Garðinum og reyndar víðar síðustu áratugi. Uppsteypu síðasta hússins í Báruklöpp mun ljúka á næstu vikum og lokið verður við húsið í vetur að sögn Sveinbjörns Bragasonar.

Samhliða uppbyggingunni við Báruklöpp hefur fyrirtækið einnig byggt fjögur einbýlishús í Brimklöpp, sem er næsta gata við Báruklöpp. Einn leikskóli í Sandgerði hefur einnig verið hristur fram úr erminni og ýmis önnur verk, þannig að það hefur verið nóg að gera hjá þeim 20 starfsmönnum sem vinna hjá fyrirtækinu.

Sala íbúða í Báruklöpp hefur gengið vel en ennþá eru óseldar íbúðir í tveimur fullbúnum parhúsum og önnur íbúðin í síðasta húsinu, sem nú er í byggingu, er óseld. Íbúðirnar sem eru tilbúnar eru 3ja herbergja og um 140 fermetrar með bílskúr. Pétur Bragason teiknaði húsin í götunni.

Sveinbjörn segir að það sé búið að vera skemmtilegt verkefni að byggja heila götu frá grunni. „Við erum að byggja fallegustu götuna í Garðinum og ég vil geta komið í þessa götu efir 20 ár og hún verður áfram falleg.“

Í næstu götu við Báruklöpp, Brimklöpp, hefur fyrirtækið reist fjögur einbýlishús og þau verða kláruð í vetur og einangruð og klædd í sama stíl og húsin við Báruklöpp.

Framundan hjá Braga Guðmundssyni ehf. er svo bygging á þrettán íbúða fjölbýlishúsi í sama hverfi, Klappa- og Teigahverfi í Garði í Suðurnesjabæ.

Þeir sem vilja kynna sér íbúðirnar við Báruklöpp nánar geta séð eignirnar á vef fasteignasölunnar Stuðlabergs.