Úrbótateymi skipað vegna athugana á barnaverndarþjónustu Reykjanesbæjar

Bæjarráð Reykjanesbæjar hefur brugðist við niðurstöðum nýrrar skýrslu Gæða- og eftirlitsstofnunar velferðarmála (GEV) sem varðar málavinnslu barnaverndarþjónustu bæjarins við vistun barna utan heimilis. Málið var tekið fyrir á fundi bæjarráðs þann 1. apríl síðastliðinn.

Skýrslan var unnin sem frumkvæðisathugun stofnunarinnar og var efni hennar kynnt oddvitum á fundi með Heru Ósk Einarsdóttur, sviðsstjóra velferðarsviðs, fyrr í vikunni. Í kjölfarið hefur þegar verið skipað sérstakt úrbótateymi sem hefur hafið vinnu við gerð áætlunar til að mæta þeim athugasemdum sem fram koma í skýrslunni.

Bæjarráð leggur mikla áherslu á að úrbætur verði unnar með markvissum hætti. Samkvæmt tímaáætlun skal úrbótaáætlunin liggja fyrir eigi síðar en 29. apríl næstkomandi og stefnt er að því að allri innleiðingu breytinga verði lokið fyrir lok þessa árs. Til að tryggja góða stjórnsýsluhætti munu bæjarráð og velferðarráð fá reglulegar upplýsingar um hvernig miðar í þessari mikilvægu vinnu.