Stærra íþróttahús samþykkt við Myllubakkaskóla
Stjórn eignasjóðs Reykjanesbæjar hefur samþykkt að stækka fyrirhugað íþróttamannvirki við Myllubakkaskóla miðað við upphaflegar áætlanir. Ákvörðunin var tekin á fundi stjórnar þann 26. mars síðastliðinn þar sem farið var yfir nýja þarfagreiningu og breytingatillögur frá Arkís arkitektum.
Breytingarnar eru gerðar til þess að húsið uppfylli strangar kröfur um öryggi iðkenda og til þess að hægt sé að koma fyrir viðunandi áhorfendasvæði í mannvirkinu. Þrátt fyrir að byggingin verði stærri en fyrstu teikningar gerðu ráð fyrir, liggur fyrir að aukinn kostnaður rúmast innan þeirra heildarfjárheimilda sem þegar hafa verið eyrnamerktar verkefninu.
Með þessu verður aðstaðan við Myllubakkaskóla bæði öruggari og fjölhæfari fyrir nemendur og aðra iðkendur til framtíðar.
