Uppbyggingarsjóður Suðurnesja úthlutar 53 milljónum til 43 verkefna

Uppbyggingarsjóður Suðurnesja hefur úthlutað styrkjum fyrir árið 2026. Alls bárust 64 umsóknir um rúmlega 160 milljónir króna, en sjóðurinn úthlutar nú 53 milljónum króna til 43 menningar-, samfélags-, atvinnu- og nýsköpunarverkefna á Suðurnesjum.

Úthlutunarhátíðin fór fram í Stapanum í Hljómahöll föstudaginn 21. nóvember þar sem Kvennakór Suðurnesja flutti tvö lög við hátíðlega stemningu. Kórinn hlaut sjálfur styrk fyrir Landsmót íslenskra kvennakóra sem haldið verður í Reykjanesbæ næsta sumar.

Tilgangur Uppbyggingarsjóðs Suðurnesja er að styðja við fjölbreytt menningar-, atvinnu- og nýsköpunarverkefni í landshlutanum, í samræmi við markmið Sóknaráætlunar Suðurnesja. Sjóðurinn er samkeppnissjóður og voru umsóknir metnar út frá skýrum áherslum og markmiðum.

Stærstu styrkveitingarnar

Meðal stærstu styrkja úthlutunarinnar má nefna:

• Safnahelgi Suðurnesja – fær 3,5 m.kr. á öðru ári þriggja ára samnings sem eitt af lykilmenningarverkefnum svæðisins.

• Nanó-kísill úr jarðhita – prófanir í landbúnaði (GeoSilica Iceland hf.) – fær 3,3 m.kr. til þróunar grænnar og sjálfbærrar lausnar fyrir íslenskan landbúnað.

• Stóru sólmyrkvagleraugun (Reykjanes jarðvangur) – fær 2,7 m.kr. til undirbúnings fyrir almyrkva á sólu 12. ágúst 2026, þar sem lögð verður áhersla á öryggi og fræðslu fyrir íbúa og gesti.

• Barnamenning í Reykjanesbæ – BAUN – fær 2,5 m.kr. til umfangsmikillar barnamenningarhátíðar í samstarfi menningarstofnana, leik- og grunnskóla.

• Grindavíkurskip – tíróinn áttæringur (Hollvinasamtökin Áttæringurinn) – fær 2,5 m.kr. til að ljúka nýsmíði áraskips sem er mikilvægt menningar- og sjóminjasafn fyrir Grindavík.

Auk þess hlutu fjölmörg verkefni 2 milljónir króna í styrk, þar á meðal:

• Landsmót íslenskra kvennakóra í Reykjanesbæ

• Skelin – barnamenningarhátíð í Suðurnesjabæ

• Hvar eru hvalirnir? – hvalarannsóknir Þekkingarseturs Suðurnesja

• Aukin sóknarfæri – dósavél hjá Litla brugghúsinu

• Sjódavatn (Urta Islandica) – framleiðsla á vistvænum steinefnadrykk úr jarðsjó

• Ný kynslóð íslenskra dróna með opnum arkitektúr

• Neskja ehf. – stofnun handverkskonfektgerðar í Grindavík

Þessi verkefni bera með sér bæði sterka menningarlega slagsíðu og skýra áherslu á nýsköpun, sjálfbærni, ferðaþjónustu og atvinnuþróun.

Fjölbreytt menningar- og samfélagsverkefni

Á sviði menningar og samfélagsverkefna er styrkt víðfeðm flóra verkefna, allt frá varðveislu sögulegs minnis og menningararfs yfir í samtímalist og barnamenningu. Þar má nefna:

• Merkingu gamalla húsa í Sandgerði

• Skrásetningu munnlegra heimilda um rokksögu Reykjanesbæjar

• Afmælisrit Kvenfélagsins Fjólu við 100 ára afmæli

• Barnamenningarhátíðir, leiklistarnámskeið fyrir börn og Skáldasuð – ljóðahátíð á Suðurnesjum

• Endurheimt lista Verka Vilhjálms Bergssonar og enduruppbyggingu samkomuhússins Kirkjuhvols

• Hlaðvarpið Táraborg um Skjaldarbrunann og þátttökuleiksýninguna Landamærabörnin sem varpa ljósi á sögu svæðisins

Einnig eru styrktir fjölbreyttir tónlistar- og listsviðburðir, svo sem tónleikaröð í Hvalsneskirkju, tónleikar Márs Gunnarssonar með sinfóníuhljómsveit og ný verkefni á sviði kvikmyndagerðar og sagnamiðlunar.

Nýsköpun og atvinnuþróun í forgrunni

Í flokki atvinnuþróunar- og nýsköpunarverkefna er greinileg áhersla á grænar lausnir, staðbundnar vörur, nýja þjónustu og sértæka ferðaþjónustu. Þar má nefna:

• Þróun jarðhita nanó-kísils og varmaorkulausna í gegnum verkefnið Enabling a Sustainable Suðurnes

• Nýjar leiðir í ferðaþjónustu með Saunagus Reykjanes, DroneTrails og Fjórhjólaævintýri

• Nýjar framleiðslulausnir í mat og drykk, svo sem handgert konfekt, Sjódavatn og dósavél Litla brugghússins

• Snjallar hraðahindranir í Reykjanesbæ og þróun íslenskrar drónatækni með opnum arkitektúr

Úthlutun Uppbyggingarsjóðs Suðurnesja fyrir árið 2026 endurspeglar þannig öflugt og skapandi samfélag á Suðurnesjum, þar sem horft er bæði til varðveislu arfsins og djörfrar framtíðarsýnar á sviði menningar, nýsköpunar og atvinnuuppbyggingar.