Trjábolum stolið úr skjólvegg í Sólbrekkjuskógi

Skógræktarfélag Suðurnesja lýsir eftir trjábolum sem teknir voru úr skjólvegg í Sólbrekkjuskógi. Samkvæmt færslu félagsins á Facebook hafði tekið töluverðan tíma að koma veggnum upp.

Grisjað var í skóginum í sumar og hluti efnisins kurlaður. Bæjarstarfsmenn nýttu jafnframt trjáboli til að reisa skjólvegg sem ætlað er að draga úr vindi og bæta vaxtarskilyrði trjánna.

Félagið bendir á að skjól geti ráðið úrslitum um hvort tré lifi á Suðurnesjum. Fyrir skömmu hafi hins vegar trjábolir verið teknir úr veggnum.

Í færslunni biðlar félagið til þeirra sem verða varir við að einhver sé að reisa bjálkakofa eða sambærilegt mannvirki þessa dagana að láta Skógræktarfélag Suðurnesja eða lögregluna vita.

Með færslunni birtir félagið myndir af skjólveggnum fyrir og eftir meintan þjófnað.