Töluverður eldur í bíl í Sandgerði

Slökkvilið Brunavarna Suðurnesja réð niðurlögum elds í Kia fólksbifreið á Sandgerðisvegi í morgun. Fjölmennt lið viðbragðsaðila frá lögreglu og slökkviliði var sent á vettvang.

Tilkynnt var um eldinn á ellefta tímanum í morgun en ökumaður, sem var á leið út úr Sandgerði, hafði fundið lykt eins og af brennandi rafmagnsvírum augnabliki áður en vélarrými bílsins, sem gengur fyrir jarðefnaeldsneyti, varð alelda.

Reykur frá brennandi bílnum sást alla leið til Reykjanesbæjar en slökkviliðsmenn voru fljótir að slökkva eldinn þegar komið var á vettvang.

Lögregla lokaði vettvangi og beindi umferð á hjáleið meðan unnið var að slökkvistarfi.