Stórstjörnur áttu ekki séns í Ingu Sóllilju

Hinn árlega verðlaunahátíð barnanna, Sögur, fór fram í beinni útsendingu á RÚV um helgina og óhætt er að segja að ein skærasta stjarna kvöldsins hafi verið hin unga og stórefnilega Inga Sóllilja Arnarsdóttir. Hún mætti til leiks með fimm tilnefningar en fór heim með hvorki meira né minna en þrenn glæsileg verðlaun eftir að hafa lagt nokkrar af stærstu stjörnum þjóðarinnar að velli.

Skaut Ara Eldjárn og Herra Hnetusmjöri ref fyrir rass

Mesta athygli vakti þegar Inga Sóllilja var krýnd Sjónvarpsstjarna ársins. Þar átti hún í höggi við algjörar risastjörnur í íslensku skemmtanalífi, en á meðal tilnefndra í flokknum voru Ari Eldjárn, Aron Can, Auðunn Blöndal og Herra Hnetusmjör.

Það dregur það vel fram hversu gríðarlega vinsæl Inga Sóllilja er á meðal yngri kynslóðarinnar að hún skyldi bera sigur úr býtum gegn þessum reynsluboltum.

Sigraði líka í talsetningu og leik

Auk þess að verða sjónvarpsstjarna ársins hreppti Inga Sóllilja verðlaunin fyrir Talsetningu ársins fyrir raddsetningu sína á hinni ástkæru persónu Lilo í Lilo og Stitch. Í þeim flokki keppti hún einnig við þekkta leikara, eins og Þórhall „Ladda“ Sigurðsson og Guðjón Davíð Karlsson (Góa).

Þriðju verðlaun kvöldsins fékk hún svo sem hluti af Leikflokki ársins fyrir sýninguna Oz.

Viðloðandi nánast öll verðlaun kvöldsins

Móðir Ingu Sóllilju, Halla Karen Guðjónsdóttir, lýsti yfir gríðarlegu stolti á samfélagsmiðlum eftir hátíðina og vakti athygli á því að dóttir hennar hefði komið nálægt nánast öllu því efni sem verðlaunað var á hátíðinni:

„Það er mjög gaman að segja frá því að Stundin okkar fékk heiðursverðlaunin 2026 sem hún leikur jú í, Góðir Íslendingar var fjölskylduþáttur ársins sem hún kom stutt fram í og Krakkaskaupið var barna- og unglingaefni ársins sem hún kom líka fram í!“

Þakkaði foreldrunum fyrir að nenna að skutla og senda reikninga

Þakkarræður Ingu Sóllilju hittu beint í mark og vöktu mikla kátínu í salnum, enda stelpa sem er greinilega jafn fyndin og hún er hæfileikarík. Hún nýtti tækifærið á sviðinu og þakkaði foreldrum sínum sérstaklega fyrir tvo mjög hagnýta hluti: að nenna að skutla henni og að sjá um að senda reikningana.

„Að leika er það skemmtilegasta sem Sóllilja okkar gerir og á meðan svo er þá erum við þakklát fyrir öll þessi frábæru tækifæri sem hún fær til að láta drauma sína rætast,“ segir Halla Karen að lokum. Það er ljóst að Ísland hefur eignast nýja ofurstjörnu sem á framtíðina fyrir sér.