Stefnt að endurbótum á HS Orku- og JBÓ-velli

Bæjarstjórn Reykjanesbæjar tók á síðasta fundi undir að nauðsynlegt sé að bæta aðstöðu á Keflavíkurvelli (HS Orkuvelli) og Njarðvíkurvelli (JBÓ-velli). Málið kom til umræðu í framhaldi af fundargerð íþrótta- og tómstundaráðs nýlega.

Guðný Birna Guðmundsdóttir (S) lagði fram bókun þar sem fram kom að stýrihópur sem starfað hefur í rúmt ár að framtíðarsýn íþróttamannvirkja í bænum kynni tillögur sínar á næstu vikum. Upphaflega var stefnt að byggingu sameiginlegrar aðstöðu við Afreksbraut, en af þeim áætlunum varð ekki. Í kjölfarið var rætt við Keflavík og Njarðvík um endurbætur á núverandi völlum félaganna til að tryggja nothæfa aðstöðu næstu fimm árin hið minnsta.

Í erindum frá félögunum kom fram að helst væri þörf á viðhaldi og lagfæringum á völlunum. Bæjarstjórn þakkar félögunum fyrir greinargóðar skýrslur og mun taka málið fyrir „traustum tökum“. Kostnaðarmat og forgangsröðun verkefna verður gert sem allra fyrst.

Tillagan var samþykkt samhljóða, 11–0.