Starfsfólk HSS heiðrað fyrir framúrskarandi störf
Á ársfundi HSS voru tvær einingar stofnunarinnar heiðraðar sérstaklega fyrir framúrskarandi starfsemi og framlag til heilbrigðisþjónustu á Suðurnesjum. Heimahjúkrun HSS og ræstingaþjónustan hlutu báðar viðurkenningu frá forstjóra HSS, Guðlaugu Rakel Guðjónsdóttur.
Heimahjúkrun fremst meðal jafningja
Heimahjúkrun HSS hefur verið í lykilhlutverki við að gera öldruðum kleift að búa lengur heima og viðhalda sjálfstæði. Hlutverk heimahjúkrunar hefur vaxið og dafnað undanfarin ár og er nú með hátt hlutfall kvöld- og helgarvitjana, sem hefur skilað sér í betri líðan, auknu öryggi og minni þörf á vistun á hjúkrunarheimilum. Á fundinum var einingin heiðruð fyrir að vera „fremst meðal jafningja“ og fyrir fjölbreytt og traust þjónustuframboð sem nýtur virðingar innan samfélagsins.
Ræstingaþjónustan á HSS var heiðruð á ársfundinum sl. föstudag.
Ræstingaþjónusta með jákvæð áhrif á andrúmsloftið
Ræstingaþjónusta HSS, sem tók formlega til starfa á nýjan hátt á árinu, fékk einnig viðurkenningu fyrir faglegt og öflugt starf. Þjónustan hefur á skömmum tíma áunnið sér góðan orðstír innan stofnunarinnar, ekki aðeins fyrir góða umgengni og hreinlæti, heldur einnig fyrir jákvæð áhrif á starfsanda og ásýnd HSS. Mikil þjónustulund og metnaður starfsfólks ræstingaþjónustunnar var sérstaklega dreginn fram í ávarpi forstjóra.
Viðurkenningarnar eru hluti af markvissri viðleitni HSS til að lyfta upp góðu starfi innan stofnunarinnar og efla faglegt stolt starfsfólks.
