Sjálfstæðisflokkur og Miðflokkur með yfirburðastöðu á Suðurlandi

Nýjasta fylgiskönnun aprílmánaðar í þjóðarpúlsi Gallup fyrir RÚV sýnir afgerandi stöðu hægri flokkanna í Suðurkjördæmi, þar sem Sjálfstæðisflokkurinn og Miðflokkurinn leiða slaginn með talsverðum yfirburðum. Á meðan Samfylkingin mælist stærsti flokkur landsins á landsvísu, nær hún ekki sama flugi á Suðurlandi og situr þar í þriðja sæti.

Sjálfstæðisflokkurinn mælist stærstur í kjördæminu með 29,3% fylgi. Miðflokkurinn fylgir fast á eftir með 23,8% og er það talsvert hærra fylgi en flokkurinn mælist með á landsvísu. Samkvæmt þessum tölum fengju báðir flokkar þrjá kjördæmakjörna þingmenn hver, sem undirstrikar sterka stöðu þeirra í fjórðungnum.

Samfylkingin, sem mælist með 28,5% fylgi á öllu landinu, verður að láta sér lynda 17,3% stuðning í Suðurkjördæmi sem myndi skila flokknum tveimur þingmönnum. Þetta er ein veikasta staða flokksins í öllum kjördæmum landsins samkvæmt könnuninni.

Aðrir flokkar sem ná inn kjördæmakjörnum manni er Flokkur fólksins, sem mælist með 8,2% fylgi. Framsóknarflokkurinn og Viðreisn mælast bæði með 7,8% fylgi en ná ekki inn manni sem kjördæmakjörnum, þó möguleiki sé á jöfnunarsætum þegar lokatölur liggja fyrir.

Niðurstöðurnar sýna einnig erfiða stöðu Vinstri grænna og Pírata í kjördæminu, sem mælast með aðeins 3,2% og 1,7% fylgi. Sósíalistaflokkurinn mælist varla í fjórðungnum með 0,3%.

Alls svöruðu 554 í Suðurkjördæmi í þessari könnun.