Rangt farið með mánaðarlaun forstjóra HSS - tók út séreignasparnað

Guðlaug Rakel Guðjónsdóttir, forstjóri Heilbrigðisstofnunar Suðurnesja segir í pistli til starfsmanna HSS að fréttir um laun hennar séu með öllu rangar en fram kom í úttekt Viðskiptablaðsins að hún væri með 4,3 milljónir í laun á mánuði. Raunin sé sú að hún hafi tekið úr séreignasparnað sinn og það hafi skekkt útreikning blaðsins.

Guðlaug Rakel segir í pistli sínum: „Að undanförnu hefur verið fjallað um launahæstu embættismenn, forstjóra og starfsmenn hins opinbera í fjölmiðlum. Varðandi launamál mín þá vil ég koma því á framfæri að upplýsingar um laun mín sem forstjóra HSS eru með öllu rangar. Sannleikurinn er sá að vegna kaupa á fasteign og flutninga leysti ég út séreignasparnað minn til síðustu 30 ára, en slíkt er heimilt við sextugsaldur. Lang stærsti hluti tekna er úttekt á séreignasparnaði en ekki mánaðarlaun mín á HSS,“ segir Rakel og bendir á að sjálfsögðu hefði hún greitt þá skatta sem bar við úttekt sparnaðarins.