Öryggi smábátasjómanna í brennidepli í Sandgerði

Fimmtudaginn 9. apríl næstkomandi verður efnt til mikils öryggisdags fyrir smábátasjómenn og aðra áhugamenn um sjósókn í húsi björgunarsveitarinnar Sigurvonar í Sandgerði. Tilefnið er sameiginlegur vorfundur Samgöngustofu, Félags smábátaeigenda og Slysavarnafélagsins Landsbjargar sem fram fer á vefnum klukkan 17:00 til 18:30.

Björgunarskipið Hannes Þ. Hafstein, í samvinnu við björgunarsveitir og slysavarnadeildir á Suðurnesjum, hvetur sjómenn til að koma saman í Sandgerði, horfa á fundinn í beinu streymi og njóta glæsilegra kaffiveitinga, súpu og tertu í boði slysavarnadeildanna Unu í Garði og Dagbjargar.

Markmið fundarins er að efla öryggi á sjó með fræðslu og kynningu á nýju efni. Á dagskránni er meðal annars sýnikennsla á frágangi björgunarbáta, kynning á hættumati og hinu nýja öryggisappi smábáta, Öggunni. Þá verða nýjar öryggisauglýsingar frumsýndar og farið yfir áherslur Slysavarnaskóla sjómanna og lögskráningarkerfið Skútuna.

Að loknum fundi gefst gestum kostur á að skoða björgunarskipið Hannes Þ. Hafstein og kynna sér ýmis tæki tengd sjóbjörgun í eigu björgunarsveitanna á svæðinu. Viðburðurinn er opinn öllum þeim sem starfa á smábátum sem og öðrum sem láta sig öryggismál á sjó varða.