Ljósanótt nálgast: Undirbúningur í fullum gangi í Reykjanesbæ

Undirbúningur fyrir Ljósanótt 2026 er nú kominn á fullt skrið, en hátíðin fer fram dagana 3. til 6. september næstkomandi. Bæjarbúar og velunnarar hátíðarinnar eru hvattir til að láta ljós sitt skína og skrá viðburði sína í dagskrána fyrir 24. ágúst.

Þótt Reykjanesbær sjái um hina almennu umgjörð og fasta viðburði hátíðarinnar bendir sveitarfélagið á að það séu íbúar, félagasamtök og fyrirtæki sem ljái bænum líf og geri hátíðina að því stóra samfélagsverkefni sem raun ber vitni.

Lýsingar og uppákomur í höndum samfélagsins

Hvatt er til þess að fólk hefji undirbúning strax, hvort sem það varðar skreytingar og lýsingu í gluggum og görðum, eða að skipuleggja sérstakar uppákomur fyrir gesti hátíðarinnar. Það er einmitt samsköpun íbúa, listir og ljósadýrð sem skapa þá einstöku stemningu sem Ljósanótt er þekkt fyrir.

Skráningarfrestur viðburða til 24. ágúst

Þeir sem hyggjast halda viðburði eða vera með dagskrá á hátíðinni eru hvattir til að skrá þá inn á vefinn ljosanott.is svo þeir rati í opinbera dagskrá.

Áríðandi er að fólk skrái sína viðburði tímanlega, en lokafrestur til skráningar er mánudaginn 24. ágúst.

Á heimasíðu hátíðarinnar má finna allar helstu upplýsingar en einnig er hægt að fá ráðgjöf og eiga í samtali við skipuleggjendur með því að senda póst á netfangið [email protected].

Skilaboð hátíðarhaldara eru skýr: „Tökum höndum saman og gerum Ljósanótt 2026 einstaka!“