Hlýrra og lygnara í Grindavík

Landslagsbreytingar í kjölfar náttúruhamfaranna norðan við Grindavík hafa haft sýnileg áhrif á staðbundið veðurfar í bænum. Ný athugun veðurfræðings og umhverfis- og orkuverkfræðings sýnir að nú er bæði hlýrra og lygnara í Grindavík en áður. Frá þessu er greint á vef Grindavíkurbæjar.

Meginniðurstöður athugunarinnar

• Hlýrri norðanátt: Vindur úr norðri og sérstaklega norðaustri er nú hægari og hlýrri. Að hausti og vetri mælist hitinn að meðaltali 0,7 °C hærri en fyrir eldgosin.
• Hraunið yljar bænum: Aðalástæða hækkaðs hitastigs er sú að nýju hraunbreiðurnar eru enn að kólna og geisla frá sér varma. Loftið hitnar því þegar það strýkst yfir hraunið á leið sinni yfir bæinn. Áhrifanna mun gæta næstu árin á meðan hraunið kólnar.
• Varnargarðar og óslétt yfirborð hægja á vindinum: Nýju hraunin ásamt varnargörðunum hafa gert landslagið mun úfnara. Þetta úfna yfirborð dregur verulega úr vindhraða þegar blæs úr norðri.
• Breytingar á sumrin: Á hlýjum sumardögum mælist vindur síðdegis um 0,5 m/s hægari að jafnaði en áður. Þá eru vísbendingar um að hafgolan hafi breytt um átt eða hegðun.

Sérfræðingarnir Einar Sveinbjörnsson veðurfræðingur og Sveinn Gauti Einarsson umhverfis- og orkuverkfræðingur unnu samantektina upp úr mælingum fyrir og eftir gos. Þeir benda á að þörf sé á lengri mælingatíma og frekari rannsóknum, sérstaklega tölvumælingum nær sjálfum varnargörðunum, til að greina nákvæmlega á milli áhrifa hraunsins og garðanna.