Heimildamynd um Þóri Baldursson frumsýnd 19. nóvember

Heimildamynd í fullri lengd um ævi og störf tónlistarmannsins Þóris Baldurssonar verður frumsýnd í kvikmyndahúsum á Íslandi miðvikudaginn 19. nóvember 2025. Myndin ber heitið „MAÐURINN SEM ELSKAR TÓNLIST“ og er framleidd af OKTÓBER Productions og Fjörtíu þúsund sjötíu og fjórir kílómetrar ehf. í samvinnu við Ægir Investment.

Verkið rekur feril Þóris – sem hlaut heiðursverðlaun Íslensku tónlistarverðlaunanna árið 2011 og var sæmdur riddarakrossi 1. janúar 2013 – allt frá bernsku í Keflavík og fyrstu skrefum á dansleikjum yfir í alþjóðlega þátttöku hans í mótun diskótímans.

Þórir, sem er 81 árs, er enn virkur í tónlistarlífinu og gerir við gömul Hammondorgel í frítíma. Í myndinni ferðast hann um kunnuglega staði þar sem framtíðartónlistin disco tók á sig mynd fyrir nærri hálfri öld, hittir gamla samstarfsmenn og vini og skoðar með þeim hvernig „galdurinn“ varð til í upptökum og útsetningum sem höfðu áhrif langt inn í break, rapp og hiphop.

Í efnistökum er blanda af nýjum og gömlum viðtölum við Þóri sjálfan og fjölda samferðamanna heima og erlendis. Meðal þeirra sem tengjast sögunni eru ABBA, Boney M, Rolling Stones, Giorgio Moroder, Donna Summer, Grace Jones, Elton John, Tom Moulton og margir fleiri, auk fjölmargra íslenskra samstarfsaðila á borð við Savanna tríóið, Dátar, Hljóma, Heiðursmenn, Ævintýri og Þrjú á palli.

Myndin hlaut styrk frá Kvikmyndamiðstöð Íslands og einnig frá Reykjanesbæ, Kópavogsbæ og Dalvíkurbyggð.

Að myndinni standa framleiðendurnir Fahad Falur Jabali, Ksenija Sigmarsson og Jóhann Sigmarsson, handritshöfundur og leikstjóri er Jóhann Sigmarsson, og í kvikmyndatöku koma að Hákon Sverrisson, Baldvin Vernhardson, Tuomo Hutri, Sigurjón „Vinstri hönd“, Lýður Árnas­on, Einar Snorri Einarsson og Bjarni Einarsson. Klippingu annast Einar Snorri Einarsson, grænstjóri er Ksenija Sigmarsson, hljóðmeistari Jóhannes B. Bjarnason, tónlistarstjórn hjá Valgeiri „Vinstri fót“, og framleiðslustjórn hjá Fahad Falur Jabali.

Vefur myndarinnar: manlovesmusic.com