Eldgosið enn yfirstandandi

Gosvirkni helst nokkuð stöðug í gígnum sem enn gýs úr á Sundhnúksgígaröðinni. Gat opnaðist á gígnum í gær, um kvöldið byrjaði að gjósa lítillega úr opnuninni. Hreyfing á ystu hraunjöðrum er mjög lítil, en örlítið til norðurs.

Áfram viljum við ítreka hættuna sem getur skapast af því að ganga á nýlegu hrauni þar sem einungis nokkrir sentimetrar geta skilið á milli harðs hraunyfirborðsins og fljótandi hrauns, segir í tilkynningu frá Veðurstofu Íslands.

Spáð er stífri suðaustanátt í dag sem blæs gasinu til norðvesturs og mengunar gæti því orðið vart í Reykjanesbæ, Garði og í Sandgerði. Suðvestlægari vindar annað kvöld og gasmengunin berst því til norðausturs og gæti mælst á Vatnsleysu og á höfuðborgarsvæðinu.

Lítil sem engin gosmóða hefur mælst á landinu í nótt.